ក្រសួងកិច្ចការផ្ទៃក្នុងរបស់ប្រទេសអូស្ត្រាលីបានអនុញ្ញាតឱ្យជនបរទេសដែលចាក់វ៉ាក់សាំងការពារជំងឺកូវីដ-១៩ ជាមួយវ៉ាក់សាំង Sputnik V របស់រុស្សីចូលទៅក្នុងប្រទេសខ្លួន។ នេះបើយោងតាមព័ត៌មានដែលបានចេញផ្សាយនៅលើគេហទំព័ររបស់ទីភ្នាក់ងារមួយនេះកាលពីថ្ងៃចន្ទ។
សេចក្តីសម្រេចដែលទទួលស្គាល់ការចាក់វ៉ាក់សាំងរបស់រុស្ស៊ីដែលបង្កើតឡើងដោយមជ្ឈមណ្ឌលស្រាវជ្រាវជាតិ Gamaleya សម្រាប់រោគរាតត្បាត និងអតិសុខុមជីវវិទ្យានេះ ត្រូវបានធ្វើឡើងដោយផ្អែកទៅលើនិយតករឱសថជាតិដែលបានចេញផ្សាយកាលពីថ្ងៃទី១៧ ខែមករា។
នៅលើគេហទំព័ររបស់ទីភ្នាក់ងារនោះបាននិយាយថា «អ្នកត្រូវបានចាត់ទុកថាបានទទួលការចាក់វ៉ាក់សាំងពេញលេញសម្រាប់ការធ្វើដំណើរទៅ និងមកពីប្រទេសអូស្ត្រាលី ប្រសិនបើអ្នកបានចាក់គ្រប់ដូសនៃវ៉ាក់សាំងដែលត្រូវបានអនុម័ត ឬទទួលស្គាល់ដោយរដ្ឋបាលទំនិញព្យាបាល (TGA) ហើយវ៉ាក់សាំង Sputnik V ដែលបង្កើតដោយវិទ្យាស្ថានស្រាវជ្រាវ Gamaleya ក៏ស្ថិតនៅក្នុងបញ្ជីវ៉ាក់សាំងដែលត្រូវបានអនុម័ត ឬទទួលស្គាល់នោះដែរ»។
នៅពេលមុននេះ រដ្ឋបាលទំនិញព្យាបាល (TGA) នៃប្រទេសអូស្ត្រាលីបានទទួលស្គាល់វ៉ាក់សាំង Sputnik V របស់រុស្សី សម្រាប់ការបញ្ជាក់ពីស្ថានភាពនៃការចាក់វ៉ាក់សាំងប្រឆាំងនឹងការឆ្លងវីរុសកូរ៉ូណានៅពេលចូលទៅក្នុងប្រទេសនោះ។
ទីភ្នាក់ងារនេះបានសង្កត់ធ្ងន់ថា ការចាក់វ៉ាក់សាំង Sputnik V ចំនួនពីរដូសបានបង្ហាញពីប្រសិទ្ធភាពជាមធ្យម ៨៩ភាគរយប្រឆាំងនឹងការឆ្លងមេរោគរាតត្បាត និងពី ៩៨-១០០ភាគរយប្រឆាំងនឹងការចូលសម្រាកព្យាបាលនៅមន្ទីរពេទ្យ ឬការស្លាប់៕
