បាត់ដំបង៖នៅថ្ងៃ១១កើត ខែបុស្ស ឆ្នាំឆ្លូវ ត្រីស័កពុធសករាជ ២៥៦៥ ត្រូវនឹងថ្ងៃព្រហស្បតិ៍ ទី១៣ ខែមករា ឆ្នាំ២០២២
មានពលករខ្មែរនៅប្រទេសថៃ វិលត្រលប់ចូលមកក្នុងប្រទេសកម្ពុជា ក្នុងភូមិសាស្ត្រនៃខេត្តបាត់ដំបង ជារៀងរាល់ថ្ងៃ ពេលនេះអាជ្ញាធរនៅតាមបណ្តោយព្រំដែននៃខេត្តបាត់ដំបង ក៏បាននិងកំពុងធ្វើការទប់ស្កាត់ជំងឺកូវីដ-១៩ ពិសេសការហូរចូលមេរោគបំប្លែងថ្មី អូមីក្រុង និងបានធ្វើការរឹតបន្តឹងដល់ការហូរចូលរបស់ពលករខ្មែរមកពីប្រទេសថៃ ក្នុងការយកសំណាកធ្វើតេស្តរហ័សរកមេរោគកូវីដ-១៩ជាដើម ។
លោកវរសេនីយ៍ឯក សួន ស៊ីរ៉ា នាយការិយាល័យផ្សព្វផ្សាយអប់រំ នៃស្នងការដ្ឋាននគរ បាលខេត្តបាត់ដំបង បានបញ្ជាក់ថា ពលករខ្មែរចំនួន ១៦០នាក់ ក្នុងនោះមានស្រីចំនួន៥២នាក់ និងក្មេង១៣នាក់ បានវិលត្រលប់មកស្រុកកំណើតវិញ ដែលភាគីថៃបានបញ្ជូនមកតាមច្រកតំបន់អូរអន្លក់ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង ។
បន្ទាប់ពីបានធ្វើការអប់រំណែនាំបន្ថែម អំពីវិធានការការពារការឆ្លងជំងឺកូវីដ-១៩ រួចមក ក្រុមគ្រូពេទ្យជំនាញរបស់មន្ទីរសុខាភិបាល នៃរដ្ឋបាលខេត្តបាត់ដំបង បានយកសំណាកធ្វើតេស្តរហ័សលើពលករទាំង១៦០នាក់ ជាលទ្ធផលគឺអវិជ្ជមានកូវីដ-១៩ ទាំងអស់ តែក្នុងនោះមានពលករចំនួន៤៧នាក់ ស្រី១៦នាក់ និងក្មេង១៤នាក់ ត្រូវបានបញ្ជូនទៅធ្វើចត្តាឡីស័កនៅមណ្ឌលគីឡូ៩ ស្រុកសំពៅលូន ដោយពួកគាត់មិនបានចាក់វ៉ាក់សាំងបង្ការជំងឺកូវីដ-១៩ បានពេញលេញ ។
ដោយឡែកពលករដែលមានកាតចាក់វ៉ាក់សាំងចំនួន១១៣នាក់ ស្រី៣៦នាក់ និង ក្មេង១៥នាក់ ដែលមានកាតចាក់វ៉ាក់សាំងបានពេញលេញ ក្នុងនោះក៏បានចាក់វ៉ាក់សាំងឱ្យក្មេងចាប់ពីអាយុ៥ឆ្នាំ ដល់១៨ឆ្នាំ បានចំនួន១០នាក់ ស្រី៣នាក់ ត្រូវបានក្រុមគ្រូពេទ្យអនុញ្ញាតឱ្យវិលត្រលប់ទៅស្រុកកំណើតរៀងៗខ្លួនវិញ ៕
