រលកនៃការផ្ទុះឆ្លងវីរុសបម្លែងថ្មីអូមីក្រុងវាយលុកអ្នកដែលមិនបានចាក់វ៉ាក់សាំងនៅអឺរ៉ុប

នាយកអង្គការសុខភាពពិភពលោក (WHO) ប្រចាំតំបន់អ៊ឺរ៉ុប លោក Hans Kluge បានព្រមានកាលពីថ្ងៃអង្គារថា វីរុសបម្លែងថ្មីអូមីក្រុងអាចឆ្លងរាលដាលកាន់តែខ្លាំងនៅក្នុងទ្វីបអឺរ៉ុប ខណៈដែល «រលកនៃការផ្ទុះ» នៃការឆ្លងកំពុងរាលដាលនៅតំបន់ខាងកើត។

លោក Kluge បាននិយាយថា «ខ្ញុំក៏មានការព្រួយបារម្ភយ៉ាងខ្លាំងផងដែរថា ខណៈដែលវីរុសបម្លែងថ្មីនេះកំពុងឆ្លងរាលដាលនៅតំបន់ខាងកើត យើងនៅមិនទាន់ឃើញពីផលប៉ះពាល់ពេញលេញរបស់វានៅក្នុងបណ្តាប្រទេសដែលកម្រិតនៃការចាក់វ៉ាក់សាំងមានកម្រិតទាបនៅឡើយទេ។ យើងនឹងឃើញមានអ្នកជំងឺកាន់តែធ្ងន់ធ្ងរនៅក្នុងចំណោមអ្នកដែលមិនទទួលបានការចាក់វ៉ាក់សាំង»។
យោងតាមលោកបានឱ្យដឹងថា នាពេលបច្ចុប្បន្ននេះ វីរុសបម្លែងថ្មីអូមីក្រុងបានរីករាលដាលដល់តំបន់បាល់កង់ហើយ ហើយកំពុងមានវត្តមាននៅក្នុងប្រទេសចំនួន ៥០ ក្នុងចំណោម ៥៣ប្រទេសនៅក្នុងតំបន់អឺរ៉ុប និងអាស៊ីកណ្តាល។

លោក Kluge បាននិយាយថា «នៅក្នុងអត្រានេះ វិទ្យាស្ថានសម្រាប់វាស់វែង និងវាយតម្លៃសុខភាព (IHME) បានព្យាករថា ជាង ៥០ភាគរយនៃចំនួនប្រជាជនក្នុងតំបន់នឹងឆ្លងវីរុសបម្លែងថ្មីអូមីក្រុងក្នុងរយៈពេលពី ៦ ទៅ ៨សប្តាហ៍ខាងមុខ»។
លោក Kluge បាននិយាយថា ការសម្រាកព្យាបាលនៅតាមមន្ទីរពេទ្យកំពុងមានការកើនឡើងដោយសារតែទំហំនៃការចម្លងដែលមិនធ្លាប់មានពីមុនមកនៅក្នុងតំបន់។

ដើម្បីគ្រប់គ្រងផលប៉ះពាល់បំផ្លិចបំផ្លាញពីជំងឺកូវីដ-១៩ ទៅលើសេវាសុខភាព សេដ្ឋកិច្ច និងសង្គមឱ្យបានល្អប្រសើរជាងមុន លោក Kluge បានអំពាវនាវឱ្យមានសកម្មភាពជាក់ស្តែង រួមទាំងការធ្វើសកម្មភាពភ្លាមៗ និងការរៀបចំផែនការសម្រាប់ឧប្បត្តិហេតុនេះ និងផ្តល់អាទិភាពដល់ប្រព័ន្ធឆ្លើយតបឱ្យបានទាន់ពេលវេលា។
លោកក៏បានសង្កត់ធ្ងន់ផងដែរអំពីសារៈសំខាន់នៃកិច្ចការពារជនងាយរងគ្រោះ និងកាត់បន្ថយការរំខានដល់ប្រព័ន្ធសុខាភិបាល និងសេវាសំខាន់ៗទៀត។

លើសពីនេះទៀត លោក Kluge បានបង្ហាញអំពីក្បួនរក្សាស្ថេរភាពនៃការគ្រប់គ្រងជំងឺរាតត្បាតនេះចំនួន ៥ របស់លោកដែលរួមមាន ការចាក់វ៉ាក់សាំង ការចាក់ដូសជំរុញ ការបង្កើនការពាក់ម៉ាសការពារ ការធ្វើឱ្យមានខ្យល់ចេញចូលនៃកន្លែងដែលមានមនុស្សច្រើន ឬកន្លែងបិទជិត និងការបន្តប្រើប្រាស់ពិធីការគ្លីនិកថ្មីដើម្បីណែនាំការឆ្លើយតបទៅនឹងការឆ្លងរាលដាលវីរុសបម្លែងឌែលតា ឬអូមីក្រុង៕ ៈ