ខេត្តកណ្ដាល៖ថ្ងៃ ចន្ទ ៨កើត ខែបុស្ស ឆ្នាំឆ្លូវ ត្រីសក័ ពុទ្ធសរាជ២៥៦៥ ត្រូវនឹងថ្ងៃទី១០ ខែមករា ឆ្នាំ២០២២
អភិបាលខេត្តកណ្ដាល ឯកឧត្ដម គង់ សោភណ្ឌ័ បានចាត់ទុកការបើកបវេសនកាល ឆ្នាំថ្មី ឆ្នាំសិក្សា ២០២១ -២០២២នេះ ស្ថិតក្នុងប្រក្រតីភាពគន្លងថ្មី នៃវិសយ័អប់រំ ខណ:ដែលសិស្សានុសិស្ស គ្រប់ថ្នាក់និងគ្រប់ភូមិសិក្សា ទូទាំងខេត្ត បានចូលរៀនដោយផ្ទាល់ឡើងវិញ បន្ទាប់ពីថ្នាក់រៀន ជំនួសដោយការរៀន តាមប្រពន្ធ័អនឡាញ អស់រយ:ពេល ជិត២ឆ្នាំកន្លងមកនេះ ដោយសារជម្ងឺកូវិដ១៩។
ថ្លែងបើក បវេសនកាល ឆ្នាំសិក្សាថ្មី នៅវិទ្យាល័យ ហ៊ុន សែន សេរីភាព នៅថ្ងៃទី១០មករានេះឯកឧត្ដម អភិបាលខេត្ត បានថ្លែងអំណរគុណយ៉ាងជ្រាលជ្រៅ ចំពោះថ្នាក់ដឹកនាំគ្រប់ជាន់ថ្នាក់ មាតាបិតា អាណាព្យាបាល សប្បុរសជន គណៈគ្រប់គ្រងគ្រឹះស្ថាន សិក្សា ជាពិសេសលោកគ្រូ អ្នកគ្រូ ដែលបានពុះពារឧបសគ្គគ្រប់បែបយ៉ាងប្រកបដោយស្មារតីសាមគ្គីភាព ភក្តីភាព និងមុះមុត ក្នុងការឧបត្ថម្ភគាំទ្រ និងធានាផ្ដល់នូវការរៀនសូត្រ តាមគ្រប់រូបភាព ដល់សិស្សានុសិស្ស ក្នុងអំឡុងពេលនៃការប្រយុទ្ធប្រឆាំងនឹងជំងឺកូវីដ-១៩។
ឯកឧត្ដមអភិបាលខេត្ត សំណូពរមន្ទីរអប់រំខេត្ត បន្តដឹកនាំ និងអនុវត្តនូវទស្សនាទានថ្មី “គន្លងប្រក្រតីភាពថ្មី ក្នុងវិស័យអប់រំ ដោយគិតគូរអំពីជម្រើស និងអភិវឌ្ឍធនធានបង្រៀន និងរៀនឱ្យបានច្រើន សម្បូរបែប ដើម្បីធានាផ្តល់សេវាអប់រំ ដែលមានភាពឆ្លើយតប និងរស់រវើក តាមទម្រង់នៃវិមជ្ឈការ និងវិសហមជ្ឈការនៃសេវាអប់រំ។
ជាងនេះទៀត គ្រប់គ្រឹះស្ថានសិក្សា បន្តលើកកម្ពស់សុខភាពអនាម័យក្នុងបរិបទកូវីដ-១៩ ដោយអនុវត្ត តាមអភិក្រម“៣កុំ ៣ការពារ” ជាពិសេសត្រូវមានវិធានការឆ្លើយតបនិងចូលរួមទប់ស្កាត់ភ្លាមៗ ដើម្បីការពារកុំឱ្យមានការឆ្លងកូវីដ-១៩ នៅក្នុងគ្រឹះស្ថានសិក្សា ៕
