ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឱ្យអ្នកឆ្លងជំងឺកូវីដ១៩ បំប្លែងថ្មីអូមីក្រុង ត្រូវទៅព្យាបាលនៅមន្ទីរពេទ្យដាច់ខាត ដើម្បីទប់កុំឱ្យជំងឺដ៏កាចសាហាវ នេះឆ្លងចូលក្នុងសហគមន៍ ។ ក្នុងពិធីប្រគល់ប្រាក់រង្វាន់របស់រាជរដ្ឋាភិបាល ជូនកីឡាការិនី អ៊ុក ស្រីមុំ ក្រោយដណ្តើមបានមេដាយមាសពិភពលោកពីការប្រកួតកីឡាប៉េតង់ នៅប្រទេសអេស្ប៉ាញ នៅព្រឹកថ្ងៃទី០៥ ខែមករា ឆ្នាំ២០២២ នេះ នាទីស្តីការគណៈរដ្ឋមន្រ្តី សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានមានប្រសាសន៍ ដោយមិនអនុញ្ញាតឱ្យអ្នកឆ្លងជំងឺកូវីដ១៩បំប្លែងថ្មីប្រភេទអូមីក្រុង សម្រាកព្យាបាលនៅតាមផ្ទះឡើយ ដើម្បីទប់ស្កាត់កុំឱ្យឆ្លងរីករាលដាលចូលក្នុងសហគមន៍។ សម្តេចតេជោ ហ៊ុន សែន បន្តថា ចំពោះអ្នកឆ្លងកូវីដបំប្លែងថ្មី អូមីក្រុង ត្រូវតែព្យាបាលនៅតាមមន្ទីរពេទ្យ ទោះជាអ្នកណាឬនៅទីណាក៏ដោយ ខណៈដែលយើងទាំងអស់គ្នាត្រូវមានការប្រុងប្រយ័ត្ន និងបន្តប្រយុទ្ធប្រឆាំងកូវីដ-១៩ ជាពិសេស ប្រភេទបំប្លែងថ្មីអូមីក្រុងនេះ ។
សម្តេចតេជោ ក៏បានព្រមានពីការបិទក្រុង ឬប្រទេសឡើងវិញ ក្នុងករណីជំងឺកូវីដបំប្លែងខ្លួនថ្មី អីមីក្រុងឆ្លងចូលសហគមន៍។ ការព្រមាននេះធ្វើឡើងខណៈពេលក្រសួងសុខាភិបាលកម្ពុជា ប្រកាសរកឃើញកូវីដបំប្លែងខ្លួនថ្មីប្រភេទអូមីងក្រុង ចំនួន៩ករណី ទៀតកាលពីថ្ងៃទី៤មករា ជាករណីនាំចូល ។
សម្តេចតេជោ ហ៊ុន សែន បានបញ្ជាឱ្យដឹងផងដែរថា រហូតមកដល់ពេលនេះ កម្ពុជាមានអ្នកវិជ្ជមានមេរោគកូវីដ១៩ អូមីក្រុង ចំនួន៩៤ករណីហើយ ប៉ុន្តែក្នុងចំណោមនោះមានមួយចំនួនបានជាសះស្បើយហើយ ខណៈអ្នកមិនទាន់ជាសះស្បើយកំពុងសម្រាកព្យាបាលនៅតាមមន្ទីរពេទ្យរដ្ឋ។
សម្តេចបញ្ជាក់ថា «ការបន្ត ប្រយុទ្ធប្រឆាំងជាមួយកូវីដ១៩ ក្នុងនោះមានមេរោគបំប្លែងថ្មី ដែលខ្ញុំសូមដាក់បញ្ជាដាច់ណាត់ ហើយមិនចាំបាច់សុំយោបល់ខ្ញុំទេ ព្រោះប៉ុន្មានករណីហើយដែលបានស្នើសុំយោបល់មកខ្ញុំថា ឥឡូវសាមីខ្លួនប្រកែកអត់ព្រម ខ្ញុំថាអត់បានទេ ។ ឥឡូវខ្ញុំសូមចេញបទបញ្ជាជាសាធារណៈ ឱ្យឮទាំងអស់គ្នានៅទូទាំងប្រទេស ហើយកុំចាំបាច់សួរយោបល់ខ្ញុំ បើត្រូវយកត្រាក់ទ័រទៅអូសក៏យកដែរ កុំឱ្យពិបាក។
តិចៗលើកទូរស័ព្ទសុំយោបល់កូនអ្នកនេះ កូនអ្នកនោះ ឥឡូវសុំព្យាបាលនៅផ្ទះ ប្រពន្ធអ្នកនេះសុំព្យាបាលនៅផ្ទះ ឥឡូវដាក់បទបញ្ជាអ៊ីចឹងហ្មងជាចំហ ដើម្បីធានាថាឱ្យមេរោគបំប្លែងថ្មីអូមីក្រុងហើយគឺត្រូវចូលពេទ្យ ព្យាបាលហើយចាំមកផ្ទះ អត់ថាអ្នកនោះឋានៈអី មានឬក្រ មកពីប្រទេសណា »៕
