មហាជនពានរង្វាន់ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ ត្រូវបានបើកការប្រកួត កាលពីថ្ងៃទី០២ខែមករា ឆ្នាំ២០២២ នៅទីលានបាល់ទាត់វិទ្យាល័យសម្ដេចតេជោ ហ៊ុន សែន សួង ។
ក្នុងពិធីបើកការប្រកួតនាឱកាសនោះ ក្រោមអធិបតីភាពឯកឧត្តម កេង ប៊ុនណា អភិបាលរងខេត្តត្បូងឃ្មុំ និងមានអញ្ជើញចូលរួមពី ប្រធាន/អនុប្រធានមន្ទីរ អភិបាលស្រុក/ក្រុង ក្រុមកីឡាករ កីឡាការីនី ព្រមទាំងប្រជាពលរដ្ឋយ៉ាងច្រើនកុះករ។
ថ្លែងនាឱកាសនោះ ឯកឧត្តម កេង ប៊ុនណា អភិបាលរងខេត្តត្បូងឃ្មុំ បានកោតសសើរ និងគាំទ្រយ៉ាងពេញទំហឹងចំពោះកម្មវិធីបើកប្រកួតនេះ ដើម្បីក្នុងការទិសដៅជ្រើសរើសរកក្រុមកីឡាករ ដែលមានបទពិសោធន៍ បច្ចេកទេស សមត្ថភាព និងក្រមសីលធម៌ ពេលប្រកួតបានល្អសម្រាប់ត្រៀមទៅចូលរួមប្រកួតស៊ីហ្គេម២០២៣ និងកម្មវិធីប្រកួតបន្តបន្ទាប់ទៀត។
ឯកឧត្តម បន្តថា ការប្រកួតកីឡាមហាជននាពេលនេះ គឺដើម្បីសុខភាព តែបើប្រទេសជាតិមិនមានសន្តិភាព ក៏មិនអាចយើងទាំងអស់គ្នាបានជួបជុំលេងកីឡាជាមួយគ្នាបានឡើយ ដូច្នេះយើងត្រូវ អរគុណសន្តិភាព អរគុណសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលខិតខំការពារថែរក្សាសន្តិភាព និងការអភិវឌ្ឍប្រទេសរហូតបានមកដល់សព្វថ្ងៃនេះ ពិសេសព្រឹត្តិការណ៍កីឡានេះ គឺដើម្បីអបអរសារទ រម្លឹកការចងចាំនៅថ្ងៃកំណើតទី២ គម្រប់៤៣ឆ្នាំ នៃទិវាជ័យជំនះ០៧មករា ។
ឯកឧត្តម បានផ្ដាំផ្ញើដល់ក្រុមកីឡាករ កីឡាការីនីទាំងអស់ ក្នុងការប្រកួតយកឈ្នះដៃគូរបស់ខ្លួនត្រូវផ្អែកលើកត្តាមួយចំនួនដូចជា បទពិសោធន៍ សមត្ថភាព បច្ចេកទេសកម្លាំង និងប្រាជ្ញាស្មារតី នៅពេលប្រកួតហើយត្រូវគោរពបទបញ្ញត្តិ និងវិន័យពេលប្រកួត សីលធម៌ពេលប្រកួត។ ហើយការប្រកួតនាពេលនេះ មិនមែនព្រោះតែរង្វាន់សម្រាប់ការឈ្នះនោះទេ គឺដើម្បីជួយឱ្យកីឡាករ/កីឡាការិនីម្នាក់ៗ មានការអភិវឌ្ឍទាំងផ្នែករាងកាយចិត្តវិទ្យា សង្គមវិទ្យា តាមបច្ចេកទេសជំនាញ និងសមត្ថភាព ទទួលបាននូវពេលធ្វើការហ្វឹកហាត់។ ពោលគឺត្រូវគិតពីសុវត្តិភាព និងអាកប្បកិរិយាប្រកបដោយសីលធម៌ ការគោរពគ្នានៅពេលប្រកួត ដូច្នេះគួរតែកីឡាករ/កីឡាការិនីម្នាក់ៗអនុវត្តឱ្យបាននៅពេលប្រកួត។
បើតាមការឱ្យដឹងពីលោក កា វចនា អនុប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានបញ្ជាក់ថា ការប្រកួតមហាជនពានរង្វាន់ឯកឧត្តមបណ្ឌិត អភិបាលខេត្ត មានរយៈពេល៥ថ្ងៃ ចាប់ពីថ្ងៃទី២ ដល់ថ្ងៃទី៦ ខែមករា ឆ្នាំ២០២២ ។ ដោយឡែក ក្រុមកីឡានិងកីឡាការីនី ១៨ក្លឹប រួមមាន ៖ ក្រុងសួង មាន៦ក្រុម ស្រុកតំបែរ ៣ក្រុម ស្រុកមេមត់ ៥ក្រុម សកលវិទ្យាល័យ ហេង សំរិន ត្បូងឃ្មុំ ២ក្រុម ស្រុកពញាក្រែក ៥ក្រុម ស្រុកត្បូងឃ្មុំ ៥ក្រុម សមាគមរាជសី ១ក្រុម មន្ទីរកសិកម្មខេត្ត ១ក្រុម មន្ទីរសាធារណៈការខេត្ត ១ក្រុម គណបក្សប្រជាជនកម្ពុជាខេត្ត ១ក្រុម រដ្ឋបាលខេត្តត្បូងឃ្មុំ ១ក្រុម ចម្ការកៅស៊ូជប់ ៤ក្រុម ក្រុមហ៊ុនគ្រីនហ្វីត ២ក្រុម សមាគមវាយសីស្ដេចកន ៨ក្រុម វាយសីពញាក្រែក ១ក្រុម គយត្រពាំងផ្លុង ១ក្រុម និងវាយសីខេត្តកំពង់ចាម ៤ក្រុម សរុបចំនួន៥៤ក្រុមផងដែរ៕
