ប្រជាជនរាប់ពាន់នាក់នៅក្នុងរដ្ឋចំនួនប្រាំពីរនៃប្រទេសម៉ាឡេស៊ីត្រូវបានជម្លៀសខ្លួនកាលពីថ្ងៃទី១ ខែមករា។
រហូតមកដល់ពេលនេះ ប្រជាជនជាង ១២៥ ០០០នាក់បានរងគ្រោះដោយសារភ្លៀងធ្លាក់ខ្លាំងរយៈពេលពីរសប្តាហ៍នៅក្នុងប្រទេសនេះ។
គណៈកម្មាធិការគ្រប់គ្រងគ្រោះមហន្តរាយជាតិរបស់ប្រទេសម៉ាឡេស៊ីបាននិយាយថា រដ្ឋ Kelantan រដ្ឋ Terengganu រដ្ឋ Pahang រដ្ឋ Johor រដ្ឋ Malacca រដ្ឋ Negeri Sembilan និងរដ្ឋ Sabah នៅតែរងផលប៉ះពាល់ដោយគ្រោះទឹកជំនន់ ហើយប្រជាជនចំនួន ៨ ៧២៧នាក់ត្រូវបានបង្ខំឱ្យជម្លៀសខ្លួនចេញទៅកាន់ទីជម្រកបណ្តោះអាសន្នចំនួន ១២៨កន្លែង។
យោងតាមមន្រ្តីប៉ូលីសម៉ាឡេស៊ីបានឱ្យដឹងថា មនុស្សចំនួន ៥០នាក់បានស្លាប់ និង ២នាក់ផ្សេងទៀតបានបាត់ខ្លួននៅក្នុងគ្រោះមហន្តរាយនេះ។
រដ្ឋាភិបាលម៉ាឡេស៊ីនឹងផ្តល់ជំនួយជាសាច់ប្រាក់ ឬទម្រង់ផ្សេងទៀតដែលមានតម្លៃជាង ៣៣៦លានដុល្លារអាម៉េរិកដើម្បីជួយដល់ជនរងគ្រោះ។ រដ្ឋាភិបាលនេះក៏បានស្នើឱ្យមូលនិធិអាកាសធាតុបៃតងរបស់អង្គការសហប្រជាជាតិផ្តល់ជំនួយចំនួន ៣លានដុល្លារអាម៉េរិកដល់ផែនការឆ្លើយតបទៅនឹងបម្រែបម្រួលអាកាសធាតុថ្នាក់ជាតិរបស់ខ្លួនផងដែរ៕
