ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងជាអនុប្រធានទី១ នៃសមាជិកអតីតយុទ្ធជន និងនិវត្តជនកម្ពុជា នៅព្រឹកថ្ងៃទី១៥ ខែឧសភា ឆ្នាំ២០២៦នេះ អញ្ជើញជាអធិបតីភាព ក្នុងពិធីអបអរសាទរទិវាអតីតយុទ្ធជន និងនិវត្តជនកម្ពុជា លើកទី១៩ ថ្ងៃទី១២ ខែឧសភា។
សម្តេចបវរធិបតី ហ៊ុន ម៉ាណែត បានចាត់ទុកថ្ងៃទី១២ ខែឧសភា គឺជាទិវាប្រវត្តិសាស្ត្រប្រកបដោយមោទនភាពបំផុត ដែលបងប្អូនអតីតយុទ្ធជន និវត្តជន និងប្រជាពលរដ្ឋនៅទូទាំងព្រះរាជាណាចក្រកម្ពុជា បានប្រារព្ធទិវាអតីតយុទ្ធជន និងនិវត្តជនកម្ពុជា លើកទី១៩ អនុលោមតាមស្មារតីនៃអនុក្រឹត្យលេខ១៤៥ អនក្រ.បក ចុះថ្ងៃទី១១ ខែសីហា ឆ្នាំ២០២៥ ស្តីពីទិវា អតីតយុទ្ធជន និងនិវត្តជនកម្ពុជា ក្នុងគោលបំណងលើកតម្កើងវីរភាពដ៏អង់អាចក្លាហាន និងគុណបំណាច់ដ៏ធំធេង របស់អតីតយុទ្ធជន និងនិវត្តជនកម្ពុជា ដែលបានធ្វើពលិកម្ម បូជាសាច់ស្រស់ ឈាមស្រស់ ដើម្បីបុព្វហេតុជាតិ មាតុភូមិ និងប្រជាជន។
ពលិកម្មប្រកបដោយស្មារតីស្នេហាជាតិរបស់វីរអតីតយុទ្ធជន យុទ្ធនារី កងកម្លាំងប្រដាប់អាវុធ និវត្តជនដែលជាអតីតមន្ត្រីរាជការស៊ីវិល និងប្រជាពលរដ្ឋយើងនៅគ្រប់ដំណាក់កាលនៃប្រវត្តិសាស្ត្រ បានរួមចំណែកយ៉ាងសំខាន់ក្នុងកិច្ចការពារបូរណភាពទឹកដី ការកសាងសុខសន្តិភាព និងស្ថិរភាពសង្គមសម្រាប់ព្រះរាជាណាចក្រកម្ពុជា សំដៅធានាឱ្យមានការអភិវឌ្ឍសេដ្ឋកិច្ចនិងសង្គមដើម្បីជាឧត្តមប្រយោជន៍សម្រាប់ជាតិមាតុភូមិ និងប្រជាជន។
បច្ចុប្បន្ន ចំនួនអតីតយុទ្ធជន និងនិវត្តជន មានចំនួនសរុប១៧៧,២៨១នាក់ ដែលកំពុងទទួលប្រាក់របប សន្តិសុខសង្គមប្រចាំខែពីរដ្ឋក្នុងនោះ អតីតយុទ្ធជនចំនួន ១១៩,៣២៦នាក់ ព្រមទាំងអ្នកនៅក្នុងបន្ទុក ចំនួន១៦២,៣៩៨នាក់ ចំណាយថវិកាចំនួន ៨៨,៧៦២,០៦០,៩១៤រៀល ស្មើនឹង ២២,១៩០,៥១៦ដុល្លារអាម៉េរិក (គិតត្រឹមខែធ្នូ ឆ្នាំ២០២៥)។ ចាប់ពីខែមករា ឆ្នាំ២០២៤ រាជរដ្ឋាភិបាលបានដំឡើងប្រាក់ឧបត្ថម្ភប្រចាំខែ ជូនគ្រួសាររបស់អតីតយុទ្ធជនពលីនិងមរណៈ និងប្រាក់ឧបត្ថម្ភប្តីឬប្រពន្ធ ពី១៥,០០០រៀល ទៅ៣០,០០០រៀល កូនពី១០,០០០រៀល ទៅ៣០,០០០រៀល និងឪពុក ម្ដាយ ឬអាណាព្យាបាល ពី៨,០០០រៀល ទៅ៣០,០០០រៀលក្នុងម្នាក់។
អតីតមន្ត្រីរាជការស៊ីវិល មានចំនួន៥៧,៩៥៥នាក់ និងអ្នកក្នុងបន្ទុកចំនួន ១៥,៤៧៩នាក់ កំពុងទទួល ប្រាក់របបសន្តិសុខសង្គមពីរដ្ឋ ដោយថវិកាចំណាយសរុបចំនួន ៥៣,១៧៨,៥០០,៧៨៦រៀល ស្មើនឹង ១៣,២៩៤,១២៥ដុល្លារអាម៉េរិក (គិតត្រឹមខែធ្នូ ឆ្នាំ២០២៥)។
គិតចាប់ពីខែមេសា ឆ្នាំ២០២៥ រាជរដ្ឋាភិបាលបានដំឡើងប្រាក់របបសន្តិសុខសង្គមប្រចាំខែអប្បបរមាជូននិវត្តជន ជនបាត់បង់សមត្ថភាពការងារ និងជនពិការ ដែលជាអតីតយុទ្ធជន និងនិវត្តជន ជនបាត់បង់សម្បទាវិជ្ជាជីវៈជាអតីតមន្ត្រីរាជការស៊ីវិល ឱ្យដល់៨៤៥,០០០រៀល ក្នុងមួយខែ។ ទន្ទឹមនឹងនេះ រាជរដ្ឋាភិបាលក៏បានផ្ដល់ប្រាក់ឧបត្ថម្ភក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ចំនួន៥០,០០០រៀល និងពិធីបុណ្យភ្ជុំបិណ្ឌចំនួន ៥០,០០០រៀល ជូនដល់អតីតមន្ត្រីរាជការស៊ីវិល និងនិវត្តជន ជនបាត់បង់សមត្ថភាពការងារ ជនពិការ គ្រួសារជនពលី និងគ្រួសារជនមរណៈជាអតីតយុទ្ធជន។
គិតចាប់ពីឆ្នាំ២០០៨ ដល់ឆ្នាំ២០២៥ តាមរយៈព្រះរាជអំណោយដ៏ថ្លៃថ្លារបស់សម្ដេចព្រះមហាក្សតី នរោត្តម មុនិនាថ សីហនុ និងអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ព្រមទាំងសប្បុរសជននានាបានសាងសង់ ផ្ទះសរុបបានចំនួនប្រមាណ ៧,៥០០ខ្នងផ្ទះ។
ក្នុងនោះមានការសាងសង់នៅលើទីតាំងដីលំនៅឋាន ផ្ទាល់ខ្លួនតាមបណ្តារាជធានី ខេត្ត និងសាងសង់នៅលើដីសម្បទានសង្គមកិច្ចចំនួន១៤ខេត្ត រួមមាន ខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តកំពង់ធំ ខេត្តក្រចេះ ខេត្តត្បូងឃ្មុំ ខេត្តស្វាយរៀង ខេត្តកំពង់ស្ពឺ ខេត្តកំពត ខេត្តកែប ខេត្តព្រះសីហនុ និងខេត្តកោះកុង៕
