ខេត្តត្បូងឃ្មុំ៖ ទីតាំងល្បែងស៊ីសងជល់មាន់ខុសច្បាប់ដ៏ធំមួយកន្លែង កំពុងដំណើរការយ៉ាងរលូននៅចម្ការស្វាយចន្ទី ស្ថិតក្នុងភូមិស្ទឹងពេញ ឃុំជីគរ ស្រុកត្បូងឃ្មុំ ខេត្តត្បូងឃ្មុំ ដោយមានមនុស្សម្នាប្រមូលផ្តុំគ្នារាប់សិបនាក់ ព្រមទាំងយានយន្តគ្រប់ប្រភេទសម្រុកចូលលេងយ៉ាងពពាក់ពពូន ដោយគ្មានការរំខាន ឬបង្ក្រាបពីសំណាក់អាជ្ញាធរ និងសមត្ថកិច្ចមូលដ្ឋានឡើយ។
ប្រភពព័ត៌មានពីប្រជាពលរដ្ឋ និងអ្នកយាមផ្លូវនៅទីតាំងនោះ បានទម្លាយថា ការភ្នាល់ក្នុងមួយគូៗមានទំហំទឹកប្រាក់ចាប់ពី ១០ លានរៀលឡើងទៅ។ ប្រភពដដែលបានអះអាងទៀតថា មូលហេតុដែលវង់ល្បែងនេះអាចបើកដំណើរការបានដោយសេរី និងគ្មានការញញើតពីគុកច្រវ៉ាក់ គឺដោយសារតែម្ចាស់ទីតាំងបានរៀបចំ “ត្រូវរ៉ូវគ្នា” ជាមួយអាជ្ញាធរ និងសមត្ថកិច្ចពាក់ព័ន្ធក្នុងតំបន់រួចរាល់អស់ហើយ។
ការបំពានច្បាប់ និងគោលនយោបាយភូមិ-ឃុំមានសុវត្ថិភាព
សកម្មភាពនេះកំពុងតែចោទជាសំនួរយ៉ាងក្ដៅគគុកពីសាធារណជន ចំពោះប្រសិទ្ធភាពនៃការអនុវត្ត «គោលនយោបាយភូមិ-ឃុំ-សង្កាត់មានសុវត្ថិភាព» របស់រាជរដ្ឋាភិបាល ជាពិសេសត្រង់ចំណុចលុបបំបាត់ល្បែងស៊ីសងខុសច្បាប់គ្រប់ប្រភេទ។
ក្រៅពីនេះ សកម្មភាពខាងលើបានរំលោភបំពានយ៉ាងធ្ងន់ធ្ងរលើ ក្រមព្រហ្មទណ្ឌនៃព្រះរាជាណាចក្រកម្ពុជា និង ច្បាប់ស្តីពីការក្រឡាស់ល្បែង៖
*មាត្រា ២៤៩ នៃក្រមព្រហ្មទណ្ឌ (បទបើកវង់ល្បែងស៊ីសង)៖ បុគ្គលទាំងឡាយណាដែលបើកទីតាំង ឬគ្រប់គ្រងវង់ល្បែងស៊ីសងដោយគ្មានការអនុញ្ញាត ត្រូវផ្តន្ទាទោសដាក់ពន្ធនាគារពី ១ ខែ ទៅ ១ ឆ្នាំ និងពិន័យជាប្រាក់។
*មាត្រា ២៥០ នៃក្រមព្រហ្មទណ្ឌ (បទប្រមូលផ្តុំលេងល្បែង)៖ អ្នកដែលចូលរួមលេង ឬប្រមូលផ្តុំគ្នាលេងល្បែងស៊ីសងខុសច្បាប់ ក៏ត្រូវប្រឈមមុខនឹងទោសទណ្ឌតាមច្បាប់ដូចគ្នា។
ច្បាប់ស្តីពីការប្រឆាំងអំពើពុករលួយ៖ ប្រសិនបើមានការឃុបឃិត ឬទទួលផលប្រយោជន៍រវាងសមត្ថកិច្ច និងអាជ្ញាធរមានសមត្ថកិច្ចមែននោះ ករណីនេះនឹងឈានទៅដល់បទល្មើសពុករលួយ ដែលត្រូវផ្តន្ទាទោសយ៉ាងធ្ងន់ធ្ងរ។
ប្រជាពលរដ្ឋក្នុងមូលដ្ឋានបានសម្តែងការព្រួយបារម្ភយ៉ាងខ្លាំងអំពីបញ្ហាសន្តិសុខ សុវត្ថិភាព និងចោរកម្ម ដែលអាចកើតមានចេញពីវង់ល្បែងមួយនេះ ហើយពួកគេបានអំពាវនាវយ៉ាងទទូចដល់ លោកស្នងការនគរបាលខេត្តត្បូងឃ្មុំ ក៏ដូចជា គណៈបញ្ជាការឯកភាពខេត្ត មេត្តាចាត់កម្លាំងជំនាញចុះស្រាវជ្រាវ និងបង្ក្រាបទីតាំងល្បែងខុសច្បាប់នេះជាបន្ទាន់ ដើម្បីពង្រឹងច្បាប់ និងស្ដារទំនុកចិត្តរបស់ប្រជាពលរដ្ឋមកលើអាជ្ញាធរដែនដីឡើងវិញ៕
(នេះបើយោងទៅតាមអង្គភាព សារព័ត៌មាន ក្នុងស្រុកមួយចំនួមបានចេញផ្សាយ)
ពាក់ព័ន្ធនឹងការចុះផ្សាយខាងលើ អង្គភាពយើងខ្ញុំ ធ្វើការផ្សព្វផ្សាយទៅតាមវិជ្ជាជីវៈអ្នកសារព័ត៌មាន គឺរិះគន់ក្នុងន័យស្ថាបនា មិនមានចេតនាញុះញង់បំបែកបំបាក់មួលបង្កាច់ បង្ខូចបុគ្គល ស្ថាប័ន ឬអង្គភាពណាមួយឡើយ យើងខ្ញុំរងចាំទទួលការបកស្រាយបំភ្លឺ ពីភាគីម្ចាស់ទីតាំង ស្ថាប័នពាក់ព័ន្ធ រៀងរាល់ម៉ោងធ្វើការ តាមច្បាប់ស្ដីពីរបបអ្នកសារព័ត៌មាននៅកម្ពុជា៕ សូមអគុណ!
