ខេត្តព្រះវិហារ៖បើយោងតាមអង្គភាពសារព័ត៌មានក្នុងស្រុកមួយចំនួនបានចេញផ្សាយថា៖រឿងអាស្រូវរំលោភទន្ទ្រានដីព្រៃការពារធម្មជាតិ និងដីជំនឿអារក្សអ្នកតារបស់ជនជាតិដើមភាគតិច នៅក្នុងស្រុកឆែប បានផ្ទុះឡើងយ៉ាងក្តៅគគុកជាថ្មីម្ដងទៀត។ ការផ្ទុះរឿងនេះ បានកើតឡើងបន្ទាប់ពីតំណាងប្រជាពលរដ្ឋប្រមាណ ៣០នាក់ រស់នៅភូមិដងផ្លិត និងភូមិណារ៉ុង ឃុំឆែបពីរ ស្រុកឆែប ខេត្តព្រះវិហារ បានរួមគ្នាចុះទប់ស្កាត់ និងដកហូតបានម៉ាស៊ីនអារឈើចំនួន ៣គ្រឿង និងគោយន្តកន្ត្រៃ ១គ្រឿង កាលពីថ្ងៃទី២៧ ខែសីហា ឆ្នាំ២០២៦ ខណៈក្រុមល្មើសកំពុងធ្វើសកម្មភាពកាប់បំផ្លាញព្រៃឈើនៅចំណុច «ត្រពាំងអន្សម និងទីលានលោកតាដេវ»។
សូមបញ្ជាក់ថា ទីតាំង «ត្រពាំងអន្សម, ទីលានលោកតាដេវ, អន្លង់ស្វាយអ៊ា, និងអូតាឡាស» គឺជាតំបន់ព្រៃអារក្ស និងជាទីសក្ការបូជាដ៏វិសុទ្ធរបស់បងប្អូនជនជាតិដើមភាគតិច ដែលបានគោរពបូជា និងថែរក្សាតាំងពីដូនតាមក ហើយក៏ជាដីព្រះរាជក្រឹត្យផងដែរ។
បើតាមការបញ្ជាក់ពីលោក សួន សុឃីន តំណាងប្រជាពលរដ្ឋភូមិដងផ្លិត បានឱ្យដឹងថា ក្រុមមនុស្សដែលចុះមកធ្វើសកម្មភាពកាប់បំផ្លាញព្រៃឈើ និងរំលោភទន្ទ្រានដីខាងលើនេះ គឺមិនមែនជាប្រជាពលរដ្ឋរស់នៅក្នុងមូលដ្ឋានឡើយ ដោយពួកគេគឺជាក្រុមជនស៊ីឈ្នួលកាប់បំផ្លាញព្រៃឈើ។ មិនតែប៉ុណ្ណោះ ក្រុមជនទាំងនោះថែមទាំងបានអួតអាង និងអះអាងប្រាប់អ្នកស្រុកថា «មេរបស់ពួកគេជាមនុស្សមានអំណាចធំធេងណាស់» ទើបពួកគេហ៊ានធ្វើសកម្មភាពយ៉ាងរលូនបែបនេះ។
មុនឈានដល់ការចុះឃាត់គ្រឿងចក្រ សហគមន៍បានទូរស័ព្ទរាយការណ៍ជូនដំណឹងជាមុន ទៅអាជ្ញាធរស្រុកឆែប មន្ត្រីបរិស្ថាន និងមន្ត្រីជំនាញពាក់ព័ន្ធរួចរាល់ហើយ កាលពីថ្ងៃទី១៦ ខែសីហា ឆ្នាំ២០២៦។ ប៉ុន្តែរហូតមកដល់ថ្ងៃកើតហេតុ មិនឃើញមានមន្ត្រីជំនាញណាម្នាក់ ចុះទៅចាត់វិធានការ ឬអនុវត្តច្បាប់ទប់ស្កាត់ឡើយ។
ដោយសារគ្មានកិច្ចអន្តរាគមន៍ពីអាជ្ញាធរ ប្រជាពលរដ្ឋស្ម័គ្រចិត្ត ៣០នាក់ ក៏សម្រេចចិត្តសហការគ្នាចុះដកហូតវត្ថុតាងដោយផ្ទាល់ដៃ យកមកប្រគល់ជូនអាជ្ញាធរនៅសាលាឃុំឆែបពីរ។ អ្វីដែលធ្វើឱ្យមហាជនភ្ញាក់ផ្អើល និងចោទជាសំណួរនោះគឺ ទោះបីជាសហគមន៍ខិតខំរៀបចំលិខិតប្រគល់-ទទួលវត្ថុតាងបទល្មើសយ៉ាងត្រឹមត្រូវយ៉ាងណាក៏ដោយ ក៏មន្ត្រីបរិស្ថាន អាជ្ញាធរស្រុក និងមេឃុំ បែរជា «មិនហ៊ាន» ផ្តិតមេដៃទទួលយកវត្ថុតាងទាំងនោះ ហើយថែមទាំងបានដើរចេញពីសាលាឃុំបាត់ស្រមោលទៀតផង។
ប្រភពពីប្រជាពលរដ្ឋក្នុងមូលដ្ឋានបានដាក់ការសង្ស័យថា មូលហេតុដែលអាជ្ញាធរ និងមន្ត្រីជំនាញមិនហ៊ានទទួលយកវត្ថុតាងបទល្មើស គឺដោយសារដីព្រៃនៅចំណុចកើតហេតុ មានការពាក់ព័ន្ធនឹងអំពើឃុបឃិតគ្នារំលោភយកដីកាលពីពេលកន្លងទៅ។ អាជ្ញាធរ និងមន្ត្រីខិលខូចមួយចំនួន ត្រូវបានគេសង្ស័យថា បានលួចធ្វើប័ណ្ណកម្មសិទ្ធិ ឬរៀបចំឯកសាររំលោភលើច្បាប់ស្ដីពីតំបន់ការពារធម្មជាតិ និងបទប្បញ្ញត្តិព្រះរាជក្រឹត្យពាក់ព័ន្ធ ដែលតាមផ្លូវច្បាប់ត្រូវតែរំលាយ ឬបដិសេធចោលជាដាច់ខាត។
គួររំលឹកថា រាជរដ្ឋាភិបាលកម្ពុជាធ្លាប់បានចេញអនុក្រឹត្យលេខ ១០៦ អនក្រ.បក ចុះថ្ងៃទី២៨ ខែឧសភា ឆ្នាំ២០២៦ ស្តីពីនិរាករណ៍អនុក្រឹត្យលេខ ២៤៥ អនក្រ.បក ចុះថ្ងៃទី៣០ ខែវិច្ឆិកា ឆ្នាំ២០២២ ស្តីពីការកំណត់តំបន់សហគមន៍នៃតំបន់ការពារធម្មជាតិ ដើម្បីទប់ស្កាត់ និងបោសសម្អាតរាល់ការទន្ទ្រានយកដីរដ្ឋខុសច្បាប់។ ប៉ុន្តែទោះបីជារាជរដ្ឋាភិបាលបានដាក់ចេញនូវវិធានការគតិយុត្តយ៉ាងម៉ឺងម៉ាត់បែបនេះក្តី ក៏មជ្ឈដ្ឋានជុំវិញ និងប្រជាពលរដ្ឋនៅតែបន្តចោទប្រកាន់ថា បុគ្គលឈ្មោះ ស្រេង ឆវី មន្ត្រីនៅមន្ទីរដែនដី នគរូបនីយកម្ម និងសំណង់ខេត្តព្រះវិហារ បានកាប់ទន្ទ្រានយកដីព្រៃ និងប្រមូលផលប្រយោជន៍ពីដីទាំងនោះមកធ្វើប័ណ្ណកម្មសិទ្ធិឯកជនយ៉ាងរលូន ដោយអាងមានខ្នងបង្អែកការពារពីមន្ត្រីជំនាញ និងអភិបាលរងខេត្តមួយរូប។
កាលពីថ្ងៃទី១០ ខែសីហា ឆ្នាំ២០២៦ ភ្នាក់ងារសារព័ត៌មានយើងបានសុំបទសម្ភាសន៍លោក ស្រេង ឆវី ដោយលោកបានអះអាងប្រាប់ភ្នាក់ងារសារព័ត៌មានយើងថា រូបលោកធ្វើសកម្មភាពក្រោមបទបញ្ជារបស់លោក មិន ស៊ីថា អភិបាលរងខេត្ត, លោក អ៊ុំ ភឿន អតីតអភិបាលស្រុកឆែប និងលោក មាស ញឹម អនុប្រធានមន្ទីរបរិស្ថានខេត្តព្រះវិហារ ទើបធ្វើឱ្យមន្ត្រីថ្នាក់ក្រោមមិនហ៊ានប៉ះពាល់។
ដោយសារតែអស់ជំនឿលើអាជ្ញាធរមូលដ្ឋាន និងមន្ត្រីជំនាញដែលបណ្តែតបណ្តោយឱ្យបទល្មើសបន្តកើតមាន ទើបប្រជាពលរដ្ឋសម្រេចចិត្តចេញមុខទប់ស្កាត់ដោយផ្ទាល់ និងបានអំពាវនាវយ៉ាងទទូចជាខ្លាំងដល់ ឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ ជាពិសេស ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន មេត្តាចាត់វិធានការផ្លូវច្បាប់យ៉ាងតឹងរ៉ឹងបំផុត និងបញ្ជូនក្រុមអធិការកិច្ចថ្នាក់ជាតិចុះស៊ើបអង្កេតស្រាវជ្រាវករណីនេះឱ្យបានស៊ីជម្រៅ។
ប្រជាពលរដ្ឋក៏បានស្នើផងដែរឱ្យក្រសួងបរិស្ថាន រឹតបន្តឹងការអនុវត្តច្បាប់ឱ្យបានម៉ឺងម៉ាត់បំផុតចំពោះមន្ត្រីខិលខូច ឬមន្ត្រីពុករលួយទាំងឡាយណា ដែលមានការពាក់ព័ន្ធក្នុងការឃុបឃិត រំលោភអំណាច ឬបែងចែកផលប្រយោជន៍លើដីសម្បត្តិព្រៃឈើរបស់រដ្ឋ និងដីព្រៃជំនឿសហគមន៍ជនជាតិដើមភាគតិច ដើម្បីជួយសង្គ្រោះតំបន់ព្រៃឈើ និងផ្តល់ភាពយុត្តិធម៌ជូនពលរដ្ឋមូលដ្ឋានវិញ៕
