ភ្នំពេញ៖នារសៀលថ្ងៃទី៩ ខែកញ្ញា ឆ្នាំ២០២៦ លោកបណ្ឌិត ហោ គន្ធា ប្រធាន សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា បានអញ្ជើញជាអធិបតីជួបសំណេះសំណាល និងពិភាក្សាអំពីបញ្ហាប្រឈមក្នុងក្នុងវិស័យព័ត៌មាន នៅសាលប្រជុំ ភោជនីយដ្ឋានបាយ័ន មុខមន្ទីរពេទ្យកាល់ម៉ែត ដែលមានការអញ្ជើញចូលរួមពី ចាងហ្វាងការផ្សាយ និងអ្នកសារព័ត៌មានចំនួន ១២៥នាក់ មកពី៥០ អង្គភាពសារព័ត៌មាន។
ថ្លែងក្នុងពិធីសំណេះសំណាល និងពិភាក្សាអំពីបញ្ហាប្រឈមក្នុងវិស័យព័ត៌មាន លោកបណ្ឌិត ហោ គន្ធា ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា បានកោតសរសើរចំពោះអ្នកសារព័ត៌មាន ដែលតែងតែយកក្រមសីលធម៌ វិជ្ជាជីវៈ មកអនុវត្ដក្នុងពេលបំពេញភារកិច្ច និងបានចូលរួមផ្សព្វផ្សាយនូវព័ត៌មានពិតជូនប្រជាពលរដ្ឋ ដេីម្បីរក្សាបាននូវសណ្ដាប់ធ្នាប់ព័ត៌មាន និងអព្យាក្រឹតព័ត៌មាន។ លោកបណ្ឌិត បានបន្ដទៀតថា ការដែលមិនយកក្រមសីលធម៌ វិជ្ជាជីវៈ មកអនុវត្ដ នោះផ្ទុយពីច្បាប់ និងបង្កឱ្យបាត់បង់ទំនុកចិត្ត ពីអ្នកអាន ឬអ្នកទទួលព័ត៌មាន។
លោកបណ្ឌិត បានសង្កត់ធ្ងន់ថា ស្ថាប័ន ឬ អង្គភាពសារព័ត៌មាន អ្នករាយការណ៍ព័ត៌មាន គឺដេីរតួនាទីយ៉ាងសំខាន់ក្នុងសង្គម ដេីម្បីឱ្យសង្គមមានស្ថេរភាព និងរីកចម្រើន ខណៈអង្គភាព ឬ អ្នកសារព័ត៌មាន រាយការណ៍នូវព័ត៌មានពិត និងតម្លាភាព។
ក្នុងកិច្ចពិភាក្សា អ្នកសារព័ត៌មាន ដែលមានវត្តមានចូលរួមបានលេីកឡេីងថា កន្លងមកបញ្ហាប្រឈមជាច្រើន ដែលអ្នកសារព័ត៌មានបានជួបប្រទះ មានដូចជា៖មានការប្តឹង អ្នកសារព័ត៌មាន គំរៀមកំហែង មិនទុកឱកាសអោយផ្សព្វផ្សាយ កែតម្រូវឡើងវិញ តាមច្បាប់ស្ដីពីរបបអ្នកសារព័ត៌មាននៅកម្ពុជា។បងប្អូនខ្លះលើកឡើងអំពីបញ្ហាប្រឈម ដែលអង្គភាព ក៏ដូចជាអ្នកសារព័ត៌មានបានជូបប្រទៈកន្លងមក នឹងធ្វើការស្នើសុំបញ្ហាខ្លះៗទៅក្រសួងតាមរយៈលោកប្រធានសមាគមផងដែរ។
ឆ្លៀតឱកាសក្នុងពិធីសំណេះសំណាល សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា បានប្រគល់លិខិតសរសើរ ជូនអ្នកសារព័ត៌មាន ដែលសមាគមបានវាយតម្លៃថាបានអនុវត្តសកម្មភាពល្អក្នុងអាជីពព័ត៌មាន ដែលប្រកបដោយក្រមសីលធម៌ និងវិជ្ជាជីវៈផងដែរ។
ពិធីសំណេះសំណាល បញ្ចប់ទៅដោយភាពសប្បាយរីករាយសិទ្ធស្នាល ទាំងនេះបញ្ជាក់បានថា សមគមអភិវឌ្ឍន៍ វិជ្ជាជីវៈអ្នកសារព័ត៌មានកម្ពុជា ដែលមានលោកបណ្ឌិត ហោ គន្ធា ជាប្រធាន តែងតែយកចិត្តទុកដាក់ជាមួយអ្នកសារព័ត៌មាន៕សូមអរគុណ!
