ខេត្តកណ្តាល៖ ឯកឧត្តម ហូ សំបូរ អនុរដ្ឋលេខាធិការក្រសួងអប់រំ យុវជន និងកីឡា និងឯកឧត្តម ប៊ុន ផេង អភិបាលរងខេត្តកណ្ដាល នៅព្រឹកថ្ងៃទី២៨ ខែមករា ឆ្នាំ២០២៦នេះ បានអញ្ជើញជាគណៈអធិបតី ក្នុងពិធីបើកសន្និបាតបូកសរុបលទ្ធផលការងារ ឆ្នាំសិក្សា ២០២៤-២០២៥ និងលើកទិសដៅសិក្សា២០២៥-២០២៦ របស់មន្ទីរអប់រំ យុវជន និងកីឡាខេត្តកណ្តាល ដោយមានការអញ្ជើញចូលរួមពីបណ្ដាមន្ទីរអង្គភាពជុំវិញខេត្ត អាជ្ញាធរក្រុង-ស្រុក ការិយាល័យអប់រំចំណុះមន្ទីរ ព្រមទាំងលោក-លោកស្រីនាយកនាយយិកាសាលារៀនជាច្រើនរូបទៀត។
ថ្លែងនៅក្នុងពិធីនេះ ឯកឧត្តម ហូ សំបូរ បានមានប្រសាសន៍ថា ឆ្នាំ២០២៦នេះ ជាឆ្នាំសំខាន់សម្រាប់ការអភិវឌ្ឍប្រព័ន្ធអប់រំ និងការលើកកម្ពស់សមត្ថភាព យុវជន និងកីឡា ដើម្បីឆ្ពោះទៅរកសង្គមចំណេះដឹង និងសុខុមាលភាពសម្រាប់ប្រជាពលរដ្ឋកម្ពុជា។ ឯកឧត្តមអនុរដ្ឋលេខាធិការ បានបន្តថា យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចាត់ទុកវិស័យអប់រំជាវិស័យអាទិភាពទី១ ឆ្ពោះទៅអភិវឌ្ឍធនធានមនុស្ស ឱ្យមានសមត្ថភាព ចំណេះដឹង និងជំនាញខ្ពស់ ភាពច្នៃប្រឌិត ស្មារតីសហគ្រិនភាព នវានុវត្តន៍ និងក្រមសីលធម៌ សំដៅជំរុញកំណើនការងារ សមធម៌ និងចីរភាព សំដៅការពារថែរក្សា និងពូនជ្រំសមិទ្ធផលជាតិ លើកកម្ពស់កិត្យានុភាពជាតិឱ្យខ្ពស់ត្រដែត ជំរុញសន្ទុះនៃកំណើនសេដ្ឋកិច្ច និងកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជា ឆ្នាំ២០៥០។
ឯកឧត្តមអនុរដ្ឋលេខាធិការ គូសបញ្ជាក់ថា សម្តេចមហាបវរធិបតីហ៊ុន ម៉ាណែត បានដាក់ឱ្យមានការប្រឡងប្រណាំងសាលារៀនគំរូ ក្នុងគោលដៅអនុវត្តកំណែទម្រង់ វិស័យអប់រំនៅកម្រិតសាលារៀន ដើម្បីលើកកម្ពស់គុណភាពអប់រំ និងធ្វើបរិវត្តកម្មវិស័យអប់រំ។ ជាមួយគ្នានេះដែរ ក្រសួងអប់រំ យុវជន និងកីឡា ក៏បានធ្វើកំណែទម្រង់ សម្រាប់ការអប់រំជាតិរួមមាន៖ ទី១-បណ្តុះមនសិកាស្នេហាជាតិ មានស្មារតី ទទួលខុសត្រូវ ស្មោះត្រង់ និងមោទនភាពជាតិតាមរយៈការលើកកម្ពស់ ការប្រកាន់គំនិតគុណតម្លៃ បំណងប្រាថ្នារួមគ្នា ដើម្បីបង្កើតបាននូវសាមគ្គីភាពជាតិ និងអត្តសញ្ញាណជាតិ។ ទី២-ផ្តល់ការអភិវឌ្ឍគ្រប់ជ្រុងជ្រោយដល់អ្នកសិក្សា ដើម្បីទទួលបានតុល្យភាពរវាងការអភិវឌ្ឍរាងកាយសម្បទា ប្រាជ្ញាអារម្មណ៍ សោភ័ណ្ឌភាព និងស្មារតី។ ទី៣-ផលិតធនធាន មនុស្សដែលមានចំណេះដឹង បំណិន និងសមត្ថភាព ដែលស្របទៅតាមតម្រូវការទីផ្សារការងារ ដែលអាចប្រកួតប្រជែងនឹងសកលលោក។ ទី៤-រៀបចំអ្នកសិក្សាពេញមួយជីវិត ដើម្បីឲ្យពួកគេចូលរួមក្នុងពិភពលោកដែលមានទំនាក់ទំនងជា មួយគ្នា និងពឹងអាស្រ័យគ្នាទៅវិញទៅមក អាចធ្វើសកម្មភាពប្រកបដោយប្រសិទ្ធភាព និងមានការទទួលខុសត្រូវ នៅថ្នាក់មូលដ្ឋាន ថ្នាក់ជាតិ ថ្នាក់តំបន់ និងសកលលោក។
នាឱកាសនោះដែរ ឯកឧត្តមអនុរដ្ឋលេខាធិការ ក៏បានជំរុញ និងលើកទឹកចិត្ត ដល់ថ្នាក់ដឹកនាំ និងមន្ត្រីគ្រប់លំដាប់ថ្នាក់ នៃមន្ទីរអប់រំ យុវជន និងកីឡាខេត្ត សូមយកឱកាសនេះធ្វើការពិភាក្សា បង្ហាញនូវបទពិសោធ និងវិធានការនានា ដើម្បីការអភិវឌ្ឍវិស័យអប់រំ ក្នុងខេត្តកណ្តាលបានកាន់តែល្អប្រសើរឡើងថែមទៀត។
តាមរបាយការណ៍ស្វាគមន៍របស់ លោក ចេង សំអុល ប្រធានមន្ទីរអប់រំ យុវជន និងកីឡាខេត្តកណ្តាល បានឱ្យដឹងថា ឆ្នាំសិក្សា ២០២៥-២០២៦ ខេត្តកណ្តាលមាន គ្រឹះស្ថានសិក្សាសាធារណៈសរុបចំនួន ៥៥២សាលា គ្រូក្របខ័ណ្ឌ និងគ្រូកិច្ចសន្យាសរុប ១១,១៦៦ នាក់ (ស្រី ៦,១៣២ នាក់) និងសិស្ស ២៨៥,៨៤១ នាក់ (ស្រី ១៤១,៧៦៥ នាក់)។ គ្រឹះស្ថានសិក្សាឯកជន សរុបចំនួន ១៤១សាលា គ្រូ១,៦៤៣ នាក់ (ស្រី ១,១១២ នាក់) និងសិស្ស ១៨,៨៦៩ នាក់ (ស្រី ៩,៤៦៤ នាក់)។ សាលាមត្តេយ្យសិក្សាសហគមន៍ សរុបចំនួន ១៧០កន្លែង គ្រូ១៩៤នាក់ (ស្រី ១៩០ នាក់) និងសិស្ស ៥,៨៨៣ នាក់ (ស្រី ៣,០៤០ នាក់)។
