ភ្នំពេញ៖ សន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ ក្រោមមូលបទ «ការពង្រឹងប្រសិទ្ធិភាព និងសមត្ថភាពស្ថាប័នក្រោមរចនាសម្ព័ន្ធ មុខងារ និងភារកិច្ចថ្មី» ក្រសួងព័ត៌មាន ដែលប្រព្រឹត្តិទៅរយៈពេល៣ថ្ងៃ ចាប់ពីថ្ងៃទី១៩ ដល់ថ្ងៃទី២១ ខែមករា ឆ្នាំ២០២៦នេះ បានបញ្ចប់ទៅដោយទទួលបានលទ្ធផលគួរជាគាប់ប្រសើរដោយមានវាគ្មិនមកពីអគ្គនាយកដ្ឋាន/អង្គភាពជំនាញ និងក្រុមការងារសំខាន់ៗចំនួន១៦រូប បានធ្វើបទបង្ហាញពាក់ព័ន្ធនឹងសមិទ្ធផលសម្រេចបានក្នុងឆ្នាំ២០២៥ បញ្ហាប្រឈម និងទិសដៅការងារសម្រាប់ឆ្នាំ២០២៦។
ពិធីសន្និបាតបានធ្វើឡើងក្រោមអធិបតីភាពលោក នេត្រ ភក្ត្រា រដ្ឋមន្ត្រីក្រសួងព័ត៌មាន និងមានការចូលរួមពីសំណាក់ថ្នាក់ដឹកនាំ មន្ត្រីរាជការ និងប្រធានមន្ទីរព័ត៌មានទូទាំងរាជធានី-ខេត្ត ជាង៥០០នាក់ នៅរសៀលថ្ងៃទី២១ ខែកក្កដា ឆ្នាំ២០២៦នេះ។
តាមរយៈសន្និបាតនេះនៅក្នុងឆ្នាំ២០២៥ ក្រសួងព័ត៌មាន បានសម្រេចលលើការងារសំខាន់ៗ៖ ការងារព័ត៌មាន និងសោតទស្សន៍, ការងាររដ្ឋបាល និងហិរញ្ញវត្ថុ, ការងាររៀបចំផែនការយុទ្ធសាស្ត្រ និងគោលនយោបាយក្នុងវិស័យព័ត៌មាន និងសោតទស្សន៍, ការងារកំណែទម្រង់ទាំង៣ (រដ្ឋបាលសាធារណៈ វិមជ្ឈការនិងវិសហមជ្ឈការ និងការគ្រប់គ្រងហិរញ្ញវត្ថុសាធារណៈ, ការងារគ្រប់គ្រងព័ត៌មាន និងសាធារណមតិ, ការងារនីតិកម្ម, ការងារបរិវត្តកម្មឌីជីថល, ការងារកិច្ចសហប្រតិបត្តិការជាមួយដៃគូជាតិ និងអន្តរជាតិ, ការងារបណ្តុះបណ្តាលធនធានមនុស្ស និងការងារសមាគមនារី និងគាំពារសង្គម។
នាឱកាសនោះដែរ រដ្ឋមន្ត្រីក្រសួងព័ត៌មាន បានរម្លឹកដល់ថ្នាក់ដឹកនាំ និងមន្ត្រីរាជការក្រសួងព័ត៌មានគ្រប់លំដាប់ថ្នាក់ ត្រូវយល់ឱ្យបានច្បាស់អំពីគោលនយោបាយ និងផែនការយុទ្ធសាស្ត្ររបស់ក្រសួងព័ត៌មាន ដើម្បីឱ្យយើងដឹងថា ក្រសួងព័ត៌មាន បាននឹងកំពុងធ្វើកិច្ចការអ្វីខ្លះ និងងាយស្រួលក្នុងការតស៊ូមតិឱ្យកាន់តែមានប្រសិទ្ធភាព នៅពេលធ្វើការងារក្នុងវិស័យព័ត៌មាន និងសោតទស្សន៍ ជាមួយដៃគូជាតិ និងអន្តរជាតិ៕
