ត្បូងឃ្មុំ ៖ ឯកឧត្តមបណ្ឌិត អ៊ាង សុផល្លែត ប្រធានក្រុមការរាជរដ្ឋាភិបាលចុះមូលដ្ឋានខេត្តត្បូងឃ្មុំ និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកអូររាំងឪ ពញាក្រែកនិងត្បូងឃ្មុំ អញ្ជើញជាអធិបតីភាពក្នុងពិធីសំណេះសំណាល និងដាំកូនត្នោត ដើម្បីបង្កើនភាពបៃតង នៅស្រុកពញាក្រែកចំនួន ២២០០០ដើម ក្រោមអធិបតីភាព ដោយមានការអញ្ជើញចូលរួមពី ឯកឧត្ដម លោកជំទាវ លោក លោកស្រី ប្រធាន អនុប្រធាន សមាជិកក្រុមការងាររាជរដ្ឋាភិបាលចុះមូលដ្ឋានស្រុក អាជ្ញាធរមូលដ្ឋាន និងសិស្សានុសិស្ស បងប្អូនប្រជាពលរដ្ឋ នៅព្រឹកថ្ងៃទី១៧ ខែកញ្ញា ឆ្នាំ២០២៥ ស្ថិតនៅស្រុកពញាក្រែក ខេត្តត្បូងឃ្មុំ។
ថ្លែងក្នុងឱកាសនេះផងដែរ ឯកឧត្តមបណ្ឌិតប្រធាន បានពាំនាំនូវប្រសាសន៍ផ្តាំផ្ញើសួរសុខទុក្ខ ប្រកបដោយមនោសញ្ចេតនាស្រឡាញ់ និងនឹករលឹកព្រមទាំងពរសព្វសាធុការពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនដល់អង្គពិធីទាំងមូល ជាពិសេសក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌនេះផងដែរ។ ឯកឧត្តមបណ្ឌិតប្រធាន បានជំរុញឱ្យមានចូលរួមទាំងអស់គ្នា មានជំនឿជឿជាក់ និងជឿទុកចិត្តលើរាជរដ្ឋាភិបាលកម្ពុជា ដែលបាន និងកំពុងធ្វើកិច្ចការងារយ៉ាងសកម្ម ដើម្បីឧត្តមប្រយោជន៍របស់ជាតិ និងប្រជាជន។ «ការដាំដើមត្នោត និងដើមឈើឱ្យបានច្រើន ជំរុញឱ្យកម្ពុជាមានភាពស្រស់ស្អាត មានភាពបៃតង និងការរស់នៅដោយចីរភាព ស្របតាមអនុសាសន៍ដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងការឆ្លើយតបនឹងគោលនយោបាយនិងយុទ្ធសាស្រ្តរបស់រាជរដ្ឋាភិបាល ក្នុងយុទ្ធសាស្រ្តចក្រាវិស័យបរិស្ថាន ដែលមានសសរស្តម្ភ៣ គឺភាពស្អាត ភាពបៃតង និងចីរភាព។» ។
សូមបញ្ជាក់ថា ការដាំដើមត្នោតនេះ គឺជាលើកទី៤ ដែលថ្នាក់ដឹកនាំ មន្រ្តីរាជការ សមាជិក សមាជិកា ក្រុមការងារចុះមូលដ្ឋានខេត្តត្បូងឃ្មុំ រដ្ឋបាលខេត្តត្បូងឃ្មុំ សិស្សនុសិស្ស លោកគ្រូ អ្នកគ្រូ កងកម្លាំងប្រដាប់អាវុធគ្រប់ប្រភេទ រួមជាមួអាជ្ញាធរមូលដ្ឋានគ្រប់ថ្នាក់ និងប្រជាពលរដ្ឋ បានចូលរួមដាំដើមត្នោតនិងដើមឈើព្រៃ ចំនួន២២០០០ ដើម នៅតាមបណ្តោយព្រំដែនកម្ពុជា វៀតណាម ក្នុងភូមិសាស្រ្តខេត្តត្បូងឃ្មុំ។ នៅឆ្នាំ២០២៤ កន្លងមកនេះ ក្រសួងបរិស្ថាន សហការជាមួយរដ្ឋបាលបាលខេត្តត្បូងឃ្មុំ យុវជនកម្ពុជា កងកម្លាំងប្រដាប់អាវុធ សប្បុរសជន អ្នកស្មគ្រចិត្ត និងប្រជាពលរដ្ឋ បានដាំកូនត្នោត បានចំនួន១៥០០០ ដើម និងដើមឈើជាច្រើនផ្សេងទៀត នៅតាមព្រំដែនកម្ពុជា វៀតណាម និងតាមមូលដ្ឋាននានា នៅក្នុងខេត្តត្បូងឃ្មុំ ដើម្បីបង្កើនភាពបៃតងនៅកម្ពុជា។
មុននឹងបញ្ចាប់ ឯកឧត្តមបណ្ឌិតប្រធាន បានប្រគល់កូនឈើតំណាងជូនដល់នាយកសាលា និង រដ្ឋបាលស្រុក ឃុំ/សង្កាត់ ដើម្បីបណ្តុះផ្នត់គំនិត ពន្លកបៃតង ចូលរួមជាមួយរាជរដ្ឋាភិបាលក្នុងការសម្រេចគោលដៅប្រទេសកម្ពុជា ជាប្រទេសអព្យាក្រឹតកាបូន ។
