ប្រជាពលរដ្ឋ មានកា រអ៊ូរទាំចំពោះដេប៉ូខ្សាច់ស្តិតនៅ ក្បែរស្ពានព្រែកសំរោង ក្រុងតាខ្មៅ កំពុងបំផ្លាញផ្លូវ និង ប៉ះពាល់បរិស្ថានជាខ្លាំង..!(វគ្គ១)

ថ្ងៃទី៧ ខែឧសភា ឆ្នាំ២០២២

កណ្តាល៖តាមប្រភពពីប្រពលរដ្ឋ បានអោយដឹងថាដេប៉ូខ្សាច់ ក្បែរស្ពានព្រែកសំរោង ក្រុងតាខ្មៅ បាននិងកំពុងបំផ្លាញផ្លូវ និង ប៉ះពាល់សុខភាពពលរដ្ឋជាខ្លាំង ខណៈក្រុមរថយន្តដឹកខ្សាច់រាប់រយគ្រឿង ដែលដឹកចេញពីដេប៉ូខ្សាច់នោះ ដូចហែរបុណ្យកឋិន ទាំងថ្ងៃ ទាំងយប់ ពោលគឺ ២៤ម៉ោងលើ២៤ម៉ោង តែម្តង ។

ទីតាំងដេប៉ូខ្សាច់ទាំងនេះ ស្ថិតនៅ ភូមិព្រែកសំរោង សង្កាត់ព្រែកសំរោង ក្រុងតាខ្មៅ ខេត្តកណ្តាល ។

ប្រជាពលរដ្ឋរស់នៅក្បែរនោះ សុំមិនបញ្ចេញឈ្មោះបានប្រាប់អោយដឹងថា អស់រយៈពេលជាច្រើនឆ្នាំមកហើយ ដែលពួកគាត់ពិបាករស់នៅខ្លាំងណាស់ ពេលថ្ងៃហុយខ្លាំង ពេលយប់ថ្លង់សម្លេងរថយន្តបើកបរលឿនៗ ។

ប្រជាពលរដ្ឋ បន្ថែមថា ពួកគាត់មិនដឹងថាត្រូវធ្វើយ៉ាងណាទៀតទេ បើជម្រាបប្រាប់អាជ្ញាធរ រួចហើយ តែគ្មានប្រសិទ្ធភាពទាល់តែសោះ គឺ នៅដដែលៗធ្វើអោយប្រជាពលរដ្ឋជួបការលំបាកជាខ្លាំង ហើយមិនដឹងថា ម្ចាស់ដេប៉ូខ្សាច់ទាំងនេះ មានបុណ្យសក្តិ ខ្សែធំ ប៉ុណ្ណា នោះទេ ។

បើនិយាយរឿងសម្លេងរថយន្តបើកបរវិញ គឺ យប់ឡើងដេកមិនបានស្រួលនោះទេ សម្លេងថ្លង់ និង អាអ៊ិចកាយខ្សាច់ផង ក្រុមឡានដឹកខ្សាច់ផង ។

ដោយឡែកផ្លូវ ខ្សាច់ ទឹកហូរ ពេញផ្លូវ ធ្វើអោយខ្សាច់ ដី កក ពូនលើផ្លូវ ក្លាយជាភក់ រអិល ដល់អ្នកការធ្វើដំណើរជាខ្លាំងហើយ វាងាយធ្វើអោយកើតឡើងគ្រោះថ្នាក់ចរាចរណ៍ថែមទៀតផង ។

ប្រជាពលរដ្ឋ សង្ឃឹមថា ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាល នឹងដោះស្រាយបញ្ហានេះ ជូនដល់ប្រជាពលរដ្ឋ របស់លោកមិនខាន ៕

ជុំវិញការចុះផ្សាយខាងលើអង្គភាពសារព័ត៌មានយើងខ្ញុំ នឹងរងចាំការស្រាយបំភ្លឺ ពីសំណាក់សមត្ថកិច្ចពាក់ពន្ធ័ រៀងរាល់ម៉ោងធ្វើការ។ សូមអរគុណ!