រាជធានីភ្នំពេញ៖ នាព្រឹកថ្ងៃសៅរ៍ ១៥កើត ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី២៦ ខែកញ្ញា ឆ្នាំ២០២៦ គណៈកម្មាធិការគណបក្សប្រជាជនកម្ពុជាខណ្ឌមានជ័យ បានរៀបចំពិធីប្រកាសកែសម្រួលសមាសភាពក្រុមការងារដឹកនាំការកសាងគណបក្ស កសាងអង្គការសហជីព និងចលនាកម្មករនិយោជិតតាមរោងចក្រ សហគ្រាស គ្រឹះស្ថាន ខណ្ឌ-សង្កាត់ នៃខណ្ឌមានជ័យ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហួត ហៃ ប្រធានគណៈចលនាសហជីពរាជធានីភ្នំពេញ។
ក្នុងអង្គពិធីដ៏អធិកអធម និងមានអត្ថន័យនេះ លោក សេង គន្ធ អភិបាលនៃគណៈអភិបាលខណ្ឌមានជ័យ និងជាប្រធានគណៈកម្មាធិការគណបក្សខណ្ឌ បានឡើងអានរបាយការណ៍ស្វាគមន៍ និងបូកសរុបវាយតម្លៃខ្ពស់លើលទ្ធផលការងារកន្លងមក ជូនដល់គណៈអធិបតី និងសមាជិក សមាជិកាទាំងអស់ដែលបានចូលរួម។
បន្ទាប់មក លោក ម៉ម មុន្នី បានឡើងអានសេចក្តីសម្រេចស្តីពីការប្រកាសកែសម្រួល និងបំពាក់សមាសភាពក្រុមការងារដឹកនាំចលនាសហជីព និងកម្មករនិយោជិតក្នុងមូលដ្ឋានខណ្ឌមានជ័យ ដើម្បីតម្រង់ទិស និងបង្កើនប្រសិទ្ធភាពការងារឱ្យកាន់តែមានភាពរលូន ឆ្លើយតបបានទាន់ពេលវេលា និងចំគោលដៅ។
ជាមួយគ្នានេះដែរ ឯកឧត្តម ជា វុទ្ធី សមាជិកក្រុមការងារដឹកនាំការកសាងគណបក្ស កសាងអង្គការសហជីព និងចលនាកម្មករនិយោជិតតាមរោងចក្រ សហគ្រាស គ្រឹះស្ថាន ក្នុងខណ្ឌមានជ័យ តំណាង ឯកឧត្តម ស៊ុន ចាន់ថុល ប្រធានក្រុមការងាររាជរដ្ឋាភិបាលចុះជួយមូលដ្ឋានខណ្ឌមានជ័យ ក៏បានឡើងថ្លែងអំណរគុណយ៉ាងជ្រាលជ្រៅ និងធ្វើការប្តេជ្ញាចិត្តយ៉ាងមុតមាំក្នុងការខិតខំបំពេញភារកិច្ចដែលថ្នាក់ដឹកនាំប្រគល់ជូនឱ្យទទួលបានលទ្ធផលជោគជ័យ និងមានប្រសិទ្ធភាពខ្ពស់បំផុត។
ថ្លែងក្នុងឱកាសនោះ ឯកឧត្តម ហួត ហៃ អភិបាលរងរាជធានីភ្នំពេញតំណាង ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈកម្មាធិការគណបក្សរាជធានីភ្នំពេញ បានពាំនាំនូវការសួរសុខទុក្ខ និងបានផ្តល់មតិផ្តាំផ្ញើ ព្រមទាំងអនុសាសន៍ណែនាំសំខាន់ៗដល់ក្រុមការងារដែលទទួលបានការតែងតាំង និងកែសម្រួលថ្មី ត្រូវបន្តយកចិត្តទុកដាក់ខ្ពស់លើ៖
១.ការសាមគ្គីភាព និងឯកភាពផ្ទៃក្នុង៖ ពង្រឹងកិច្ចសហការជិតស្និទ្ធជាមួយអាជ្ញាធរដែនដី និងភាគីពាក់ព័ន្ធគ្រប់លំដាប់ថ្នាក់។
២.ការការពារសិទ្ធិ និងផលប្រយោជន៍ស្របច្បាប់៖ បន្តដោះស្រាយបញ្ហាប្រឈម និងការពារផលប្រយោជន៍ស្របច្បាប់ជូនបងប្អូនកម្មករនិយោជិតតាមរោងចក្រ សហគ្រាស និងគ្រឹះស្ថាននានាឱ្យបានល្អប្រសើរ។
៣.ការពង្រីកសមាជិកភាព និងអង្គការសហជីព៖ ជំរុញការកសាងចលនាសហជីព និងកសាងបក្សឱ្យកាន់តែរឹងមាំ សក្ដិសមជាបង្អែកយ៉ាងរឹងមាំនៅតាមមូលដ្ឋានរោងចក្រ សហគ្រាស ក្នុងខណ្ឌមានជ័យទាំងមូល។
ពិធីនេះបានបញ្ចប់ទៅដោយបរិយាកាសរីករាយ ស្និទ្ធស្នាល ប្រកបដោយភាពស្និទ្ធស្នាល និងស្មារតីទទួលខុសត្រូវខ្ពស់៕
