មន្ត្រីជំនាញសុខាភិ បាល អំពាវនាវឱ្យមាតាបិតា ត្រូវយកចិត្តទុកដាក់ចំពោះកូនតូចៗខណៈរយៈពេលបួនខែដើមឆ្នាំនេះ ករណីកើតឡើងជំងឺគ្រុនឈាម នៅក្នុងប្រទេសកម្ពុជា គឺមានរហូត ដល់ទៅ ជាង៦០០ករណី ដូចនេះត្រូវប្រុងប្រយ័ត្នឱ្យបានខ្ពស់ ដើម្បីកាត់បន្ថយការស្លាប់ និងឆ្លងនូវជំងឺមួយនេះ។
អ្នកយកព័ត៌មានយើងធ្វើសេចក្តីរាយការណ៍បន្ថែម៖
លោកវេជ្ជបណ្ឌិត លាង ឫទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃក្រសួងសុខាភិបាល បានមាន ប្រសាសន៍ថា ទិន្នន័យនៃការឆ្លង និងករណីកើតជំងឺគ្រុន ឈាមនៅក្នុងប្រទេសកម្ពុជា ត្រឹមតែរយៈពេលបួនខែដើម ឆ្នាំ២០២២នេះ កម្ពុជាមានអ្នកឆ្លងជំងឺគ្រុនឈាម ជាង ៦០០ករណី បើធៀបរយៈ ពេលដូចគ្នាកាលពីឆ្នាំ ២០២១ គឺមានការកើនឡើងច្រើនជាង ហើយចំនួននេះក៏នឹងបន្តហក់ឡើងកាន់តែច្រើន ឡើងទ្វេដង។ លោកវេជ្ជបណ្ឌិតបានបន្តថា ខេត្តដែលមានជំងឺគ្រុនឈាមច្រើនជាងគេនោះ គឺ រាជធានីភ្នំពេញ ខេត្តកណ្តាល សៀមរាប កំពង់ស្ពឺ កំពង់ធំ និងខេត្តកំពង់ចាម ។ ជាមួយគ្នានេះ មន្ត្រីសុខាភិបាលក៏បានចាប់ផ្តើមធ្វើសកម្មភាព នៅក្នុងការចុះដាក់ថ្នាំអាបែតជាបន្តបន្ទាប់ នៅតាមបណ្ដាខេត្តទាំងនោះ ដើម្បីទប់ស្កាត់ការឆ្លង និងការកកើតមូសខ្លា ដែលជាភ្នាក់ ងារចម្លងជំងឺគ្រុនឈាម។
លោកវេជ្ជបណ្ឌិត បានបន្តទៀតថា រដូវវស្សាគឺមានភ្លៀងធ្លាក់ច្រើនជាហូរហែជាឱកាសមួយ នៃការបង្កលក្ខណៈងាយ ស្រួល ឱ្យសត្វមូសខ្លាកើតកាន់តែខ្លាំង និងកាន់តែច្រើន ហើយជំងឺគ្រុនឈាមកើតមានច្រើនឡើងផងដែរ ដូចនេះសូមប្រជាពលរដ្ឋទាំងអស់ត្រូវប្រុងប្រយ័ត្នចំពោះកូនតូចៗ ដោយកុំទុកឱ្យកូននៅតែម្នាក់ ឯង ឬក៏គេងដោយមិនបានដាក់មុងជាដើម ជាពិសេសគឺចាប់ពីម៉ោង៦ព្រឹក ដល់ម៉ោង ៦ល្ងាច ព្រោះចន្លោះពេលនេះគឺជាពេលដែលសត្វមូសខ្លាចេញ។
រយៈពេលបួនខែដើមឆ្នាំនេះ គឺយើងមានជាង ៦០០ករណី ហើយស្លាប់១ ករណី ប៉ុន្មានខែនេះយើងមើលទម្រង់វាច្រើនមែន ប៉ុន្តែទោះជាយ៉ាងណាក្ដី យើងនៅតែមានការប្រុងប្រយ័ត្នជាប់ជានិច្ច ភ្លៀងវាចេះតែមានច្រើន យើងដឹងស្រាប់ហើយជំងឺគ្រុនឈាមនេះគឺវាពាក់ព័ន្ធទៅនឹងកត្តាអាកាសធាតុ និងភ្លៀង អ៊ីចឹងសុំឱ្យប្រជាជនយើងទាំងអស់ប្រុងប្រយ័ត្ន ឧស្សាហ៍លាងពាង យើងមានភ្នាក់ងារសុខាភិបាល គាត់ដាក់អាបែត គឺនៅចាំឱ្យគេដាក់អាបែត ឱ្យបានត្រឹមត្រូវ បើមានសម្បកកង់ឡាន កង់ម៉ូតូ នៅក្រៅផ្ទះគឺយកវាចេញ កុំឱ្យទឹកភ្លៀងមកដក់វាកើតជាដង្កូវ ទឹក ហើយបើមាននរណាម្នាក់ដែលមានការសង្ស័យ ក្តៅខ្លួន អាចមានជំងឺគ្រុនឈាមគឺយកមកពេទ្យជាបន្ទាន់ អ៊ីចឹងយើងត្រូវតែប្រុងប្រយ័ត្នជំងឺគ្រុន ឈាម ដែលមានឱកាសកើន ឡើងគ្រប់ពេលវេលាទាំងអស់ ហើយជាធម្មតាវាអាចកើត ឡើង២ទៅ៣ដងជាធម្មតា នៅក្នុងរដូវវស្សា ។
លោកវេជ្ជបណ្ឌិតក៏បានបញ្ជាក់ផងដែរថា សម្រាប់ឆ្នាំ២០២២នេះ កម្មវិធីជាតិប្រយុទ្ធនឹងជំងឺគ្រុនឈាម បានត្រៀមថ្នាំអាបែតប្រមាណជា១០០តោន សេរ៉ូម៦ទៅ៧ ម៉ឺនប្លោក ទឹកថ្នាំបាញ់សម្លាប់មូស ចំនួន៦០០០លីត្រ និងបានត្រៀមនូវខិត្តប័ណ្ណអប់រំ ស្ដីពីជំងឺគ្រុនឈាម ដើម្បីបង្ការនិងទប់ស្កាត់ ក្នុងករណីជំងឺគ្រុនឈាមនេះ មានការឆ្លងរាតត្បាតជាលក្ខណៈទ្រង់ទ្រាយធំ៕
