ខេត្តបាត់ដំបង៖បន្ទាប់ពីមានបទបញ្ជាពីសម្ដេចតេជោបហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ឲ្យដកតំណែងអធិការនគរបាលស្រុកកំរៀង និងបណ្ដេញពីក្របខ័ណ្ឌ ព្រមទាំងចាត់វិធានការតាមផ្លូវច្បាប់ ចំពោះការប្រព្រឹត្តអំពើពុករលួយ ដោះលែងមេខ្យល់នាំពលករឆ្លងដែនខុសច្បាប់។ នៅថ្ងៃដដែលនេះក៏មានពលករចំនួន ៤នាក់ បានបន្លំខ្លួនតាមឡានដឹកទំនិញដើម្បីឆ្លងដែនខុសច្បាប់មកកម្ពុជា ប៉ុន្តែត្រូវបានសមត្ថកិច្ចឃាត់ខ្លួន។
នេះជារូបភាពពលករខ្មែររបស់យើង៤នាក់ និងនារីជនជាតិវៀតណាមម្នាក់ បានលួចឆ្លងដែនខុសច្បាប់ពីថៃមកខ្មែរ តាមច្រកដូង ឫច្រកឡែម កាលពីព្រឹកថ្ងៃទី១៥ កុម្ភ: ដោយពួកគេបានជិះនៅក្នុងប្រដាប់ដាក់ផ្លែស្វាយលើរថយន្ត! ពេលនេះពួកគេទាំង៥នាក់ ត្រូវបានយកទៅធ្វើចត្តាឡីស័ក និងធ្វើតេស្តរកមេរោគកូវីដ១៩ហើយ។
លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង បានសម្រេចផ្អាកការងារបណ្ដោះអាសន្នលោកវរសេនីយ៍ឯក គឹម ពន្លក ជាអធិការស្រុកកំរៀង ដោយមូលហេតុ សម្រេចការងារដោយខុសនីតិវិធី ។
ការសម្រេចផ្អាកការងារ លោកអធិការស្រុកកំរៀងជាបណ្ដោះអាសន្ន បន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាដល់ថ្នាក់ដឹកនាំខេត្តបាត់ដំបង និងអគ្គស្នងការនគរបាលជាតិ ស្រាវជ្រាវជុំវិញរឿងរ៉ាវដែលមានមន្ត្រីទាហាន បានចាប់បានមេក្លោងនាំមនុស្សចេញ ចូលខ្មែរ-ថៃ ។
ក្នុងសារសម្លេងរបស់សម្តេចតេជោ ផ្សព្វផ្សាយនៅព្រឹកថ្ងៃទី ១៥ខែកុម្ភៈ ឆ្នាំ២០២១នេះ សម្តេចតេជោ បានបញ្ជាក់ថា ៖ដូចជាយប់មិញខ្ញុំបានបញ្ជាទៅកាន់ខេត្តបាត់ដំបង និងអគ្គស្នងការនគរបាលជាតិ អំពីព័ត៌មានទាក់ទិននឹងការ ចាប់បានពួកធ្វើសកម្មភាព ពួកអ្នកនាំផ្លូវហើយបែរជាដោះលែង ដែលអាចនាំទៅដល់ការដកឋានន្តរស័ក ឬបណ្តេញចេញពីជួរតែម្តង នូវមន្ត្រីនគរបាលណាដែលអនុវត្ត ខុសឆ្គង ទៅនឹងវិធានការទាំងឡាយដើម្បីប្រយុទ្ធប្រឆាំងនឹងការរត់ពន្ធមនុស្ស គឺស្ថិតក្នុងសភាពការធ្ងន់ធ្ងរដែលវាអាចនាំទៅដល់មហន្តរាយ នៃសុខភាពសាធារណៈ
( គឺជំងឺឆ្លង ) ។
សម្តេចនាយកបានបន្តថា «ខ្ញុំ សុំឲ្យចាប់ប្រមូលអ្នក ដែលជាប់ពាក់ព័ន្ធជាមួយនឹងការនាំមនុស្សឆ្លងដែនតាមច្រកផ្លូវ របៀង ដើម្បីអនុវត្តនូវការផន្ទាទោស» ឬក៏ណែនាំ ដើម្បីឲ្យពួកគេឈប់នាំមនុស្សឆ្លងដែនបន្តទៅទៀត ។
សម្តេចតេជោ បានថ្លែង ក្នុងសារជាសំឡេង នៅយប់ថ្ងៃអាទិត្យ ទី១៤ ខែកុម្ភៈ ឆ្នាំ២០២១ សម្តេចក៏បានដាក់ចេញបទបញ្ជាសាជាថ្មី ទៅកាន់អភិបាលខេត្តនៅជាប់ព្រំដែនថៃ-ខ្មែរទាំងអស់ ត្រូវតែរឹតបន្តឹងតាមបណ្តោយព្រំដែនឲ្យបានម៉ឺងម៉ាត់ជាងមុន ចំពោះការឆ្លងដែនដោយខុសច្បាប់របស់ពលករខ្មែរតាមជួរជាយដែនខ្មែរ-ថៃ ។
