ខេត្តកណ្ដាល៖ បន្ទាប់ពីទទួលបាននូវការណែនាំពី ឯកឧត្តម គង់ សោភណ្ឌ័ អភិបាលនៃគណៈអភិបាលខេត្តកណ្តាល បានដាក់ចេញវិធានការណ៍ការពារទប់ស្កាត់ការឆ្លងជំងឺកូវីដ-១៩នៅតាមបណ្តាខេត្តជាប់ព្រំដែន
កាលពីព្រឹកថ្ងៃព្រហស្បតិ៍ ១៤រោច ខែមាឃ ឆ្នាំជូត ទោសក័ ពុទ្ធសករាជ ២៥៦៤ត្រូវនឹងថ្ងៃទី១១ ខែកុម្ភៈ ឆ្នាំ២០២១
លោក ចាប ចន្ទ័វិទ្យា អភិបាលស្រុកលើកដែក បានដឹកនាំមន្ត្រីក្រោមឳវាទរបស់រដ្ឋបាលសាលាស្រុក នាំយកអំណោយមួយចំនួន ជូនដល់កងកម្លាំងទាំង៣ កំពុងឈរជើងនៅទីតាំងភូមិសាស្ត្រព្រំដែនក្អមសំណ ស្រុកលើកដែក ខេត្តកណ្តាល ។
ក្នុងកិច្ចការពារជំងឺកូវីដ១៩ តបតាមអនុសាស្ត្ររបស់ថ្នាក់ដឹកនាំ។
ក្នុងឱកាសចុះពិនិត្យស្ថានភាពនៅតាមតំបន់ព្រំដែននេះ លោក ចាប ចន្ទ័វិទ្យា បានដាក់បទបញ្ជាយ៉ាងម៉ឺងម៉ាត់ដល់កម្លាំងសមត្ថកិច្ចទាំង៣ ការពារព្រំដែន ត្រូវចាត់វិធានការ តឹងរឹងបំផុត ក្នុងការការពារ ទប់ស្កាត់ការឆ្លងរីករាលដាលជម្ងឺកូវីដ-១៩ ក្នុងឱ្យកាសបុណ្យចូលឆ្នាំថ្មីប្រពៃណីចិន-វៀតណាម នេះ។
លោក អភិបាល បន្ថែមថា ដើម្បីអនុវត្តតាមសាររបស់ប្រមុខដឹកនាំ ក៏ដូចជាជំហរដ៏ម៉ឺងម៉ាត់របស់រដ្ឋបាលខេត្តកណ្តាល ដើម្បីរក្សាសុខសុវត្ថិភាព សុខភាពជូនប្រជាពលរដ្ឋ នៅក្នុងមូលដ្ឋានខេត្តកណ្តាល ពិសេសនៅរដូវបុណ្យចូលឆ្នាំប្រពៃណីចិន-វៀតណាមនេះ កងកំលាំង និងអ្នកពាក់ព័ន្ធទាំងអស់ ត្រូវរឹតបន្តឹង និងអនុវត្តអោយមានប្រសិទ្ធភាពខ្ពស់ ជាងនេះទៀត ត្រូវត្រៀមរៀបចំមណ្ឌលចត្តាឡីស័ក សម្រាប់អ្នកធ្វើដំណើរចូលមកប្រទេកម្ពុជាតាមច្រកព្រំដែនទាំងអស់ក្នុងមូលដ្ឋានរបស់ខ្លួន ដើម្បីពិនិត្យតាមដានសុខភាពរបស់ភ្ញៀវ ព្រមទាំងធ្វើចត្តាឡីស័កអោយបានត្រឹមត្រូវផងដែរ ។
ជាចុងក្រោយ លោក ចាប ចន្ទ័វិទ្យា អភិបាលស្រុកលើកដែក បានប្រគល់ សម្ភារ:ប្រើប្រាស់ និងគ្រឿងឧបភោគបរិភោគ ជូនដល់កងកម្លាំងឈរជើងនៅទីតាំងភូមិសាស្ត្រព្រំដែនក្អមសំណ ស្រុកលើកដែក ខេត្តកណ្តាល ក្នុងកិច្ចការការពារជំងឺកូវីដ១៩ ក្នុងឱកាសបុណ្យចូលឆ្នាំប្រពៃណីចិន វៀតណាម និងជាការលើកទឹកចិត្ត អរគុណការលះបង់របស់បងប្អូនជួរមុខ។
