កសិករ ឃុំ ឃុន រស់នៅខេត្តឧត្ដរមានជ័យពង្រីកការចិញ្ចឹមបង្កងអូស្ត្រាលីរហូត ដល់១៣ស្រះ បន្ទាប់ពីមានទីផ្សារល្អនិងជោគជ័យលើការចិញ្ចឹមដើម្បីបំពេញតម្រូវការអ្នកបរិភោគឱ្យបានគ្រប់គ្រាន់និងបង្កើនប្រាក់ចំណូលក្នុងគ្រួសារថែមមួយកម្រិត។
លោក ឃុំ ឃុន ជាកសិករចិញ្ចឹមបង្កងអូស្ត្រាលីដែលរស់នៅភូមិអូរស្វាយ ឃុំ អូរស្វាយ ស្រុកត្រពាំង ប្រាសាទ ខេត្តឧត្តរមានជ័យ បានប្រាប់វិទ្យុជាតិកម្ពុជាថា ដំបូងឡើយលោកសាកល្បងចិញ្ចឹមបង្កង អូស្ត្រាលីនេះ មាន អាងចិញ្ចឹមតែ ៣ទៅ៤ អាង ប៉ុណ្ណោះ ក្រោយមកទទួលបាននូវ បច្ចេកទេសពីមន្ទីរកសិកម្មខេត្តឧត្តរមាន ជ័យនិងបទពិសោធន៍ជាក់ ស្ដែងជាបន្តបន្ទាប់មក ធ្វើឱ្យគុណភាពនិងលទ្ធផលនៃការ បង្កាត់កូនបង្កងមានកំណើនទ្វេឡើងទើបលោកអាច ពង្រីកអាងចិញ្ចឹមសរុប បាន ៨ អាង និង ស្រះចិញ្ចឹមបង្កង បាន ១៣ស្រះ ។
លោកបន្តថា ឆ្លងកាត់ការយក ចិត្តទុកដាក់ នូវបទពិសោធន៍ជាក់ស្តែងក្នុងការចិញ្ចឹម បង្កងអូស្ត្រាលីរយៈពេល៣ឆ្នាំកន្លងមកនេះ ការចិញ្ចឹមបង្កងរបស់លោកត្រូវបាន អតិថិជនគាំទ្រកុម្ម៉ង់ទិញទាំងបង្កងសាច់ និងពូជបង្កងជាច្រើនពាន់ក្បាលដែលអាចរក ចំណូលផ្គត់ផ្គង់ជីវភាពរស់នៅក្នុង គ្រួសារបានល្អប្រសើរពី១ថ្ងៃទៅមួយថ្ងៃ។
សំឡេង៖ « ខាងមន្ទីរកសិកម្មខេត្តគាត់បានជួលគ្រូមកបង្រៀនកសិករយើងប្រហែល ជា ៣០ទៅ៤០នាក់បង្កងក៏វាមិនទាន់សុំានឹងទឹកយើងយកដំបូងវាខូចខាតខ្លះដែរ ប៉ុន្តែក្រោយមកវាក៏មិនអី វាសុំានឹងទឹកមកលែងអី ហើយវាក៏ចេះ តែកើតរហូតមក។ តំបន់ខ្ញុំចិញ្ចឹមក្នុងអាង៨ អាង ស្រះបាន៣ស្រះ ដាក់បង្កងជាង៣ពាន់កូនឥឡូវហ្នឹងខ្ញុំពង្រីកស្រះបាន១៣ស្រះ ហើយស្រះទំហំ៦ម៉ែត្រគុណនឹង១៥ម៉ែត្រ ដោយក្នុង១ ស្រះខ្ញុំដាក់បង្កង២ពាន់កូន»។
លោកបន្ថែមថា ការចិញ្ចឹមបង្កងអូស្ត្រាលីមានរយៈពេលតែ៤ខែប៉ុណ្ណោះអាចលក់បានហើយបង្កងសាច់ក្នុង១គីឡូតម្លៃ១០ម៉ឺនរៀល រីឯកូនបង្កង១ក្បាលតម្លៃ១ម៉ឺនរៀល៕
