នៅព្រឹកថ្ញៃទី ០៨ ខែ ឧសភា ឆ្នាំ២០២២នេះ ឯកឧត្តម ខៀវ កាញ្ញារីទ្ធ រដ្ឋមន្ត្រីក្រសួងព័ត៍មាន និងជាប្រធានក្រុមការងារថ្នាក់កណ្តាលចុះមូលដ្ឋានស្រុក កោះសូទិន និង លោកជំទាវ ទេព រង្សី ប្រធានកិត្តិយសក្រុមគ្រូពេទ្យស្មគ្រចិត្តឯកឧត្តម រដ្ឋមន្ត្រីក្រសួងព័ត៍មាន អញ្ជើញចុះពិនិត្យព្យាបាលជំងឺទូទៅជូនប្រជាពលរដ្ឋ ដោយឥតគិតថ្លៃ ដើម្បីលើក កម្ពស់សុខភាពរបស់ប្រជាពលរដ្ឋឲ្យកាន់រឹងមាំង និងជួយសម្រាលការចំណាយរបស់ប្រជាពរលរដ្ឋលើការព្យាបាលជំងឺផ្សេងៗ។ ក្នុងពិធីសំណេះសំណាល និងពិនិត្យការព្យាបាលនោះ ក៏មានការគោរពអញ្ជើញចូលរួម ដោយ ឯកឧត្តម លោកជំទាវ ប្រធានក្រុមការងារចុះជួយឃុំមហាលាភ អភិបាលស្រុក ក្រុមប្រឹក្សាស្រុក ប្រធានមន្ទីរព័ត៍មានខេត្ត អាជ្ញាធរមូលដ្ឋាន ប៉ូលីសប៉ុស្តិ៍ និង បងប្អូនប្រជាពលរដ្ឋ ក្មេង ចាស់ ជាង៣០០នាក់ ដែលពិធីនេះ ធ្វើឡើង ស្តិតក្នុងបរិវេណ សាលាបឋមសិក្សាមហាលាភ ឃុំមហាលាភ ស្រុក កោះសូទិន ខេត្តកំពង់ចាម។
នាឱកាសនោះ ឯកឧត្តម រដ្ឋមន្ត្រីក្រសួងព័ត៍មាន បានថ្លែងអំណរគុណយ៉ាងជ្រាលជ្រៅដល់ក្រុមគ្រូពេទ្យស្ម័គ្រចិត្ត ដែលបានចុះមកជួយព្យាបាលជំងឺប្រជាពលរដ្ឋនៅក្នុង ស្រុក កោះសូទិន ខេត្តកំពង់ចាម ដោយឥតគិតថ្លៃ។ ការព្យាបាលនាពេលនេះ គឺដើម្បីជួយព្យាបាលជំងឺជូនប្រជាពលរដ្ឋ ដែលពុំមានលិទ្ធភាពព្យាបាលខ្លួនឯង ហើយកំពុងតែជួបការលំបាក ដោយមានជំងឺប្រចាំកាយរ៉ាំរ៉ៃជាយូរមកហើយនោះ។
ឯកឧត្តម ខៀវ កាញ្ញារីទ្ធ ក៏បានសំណូមពរទៅដល់ក្រុមគ្រូពេទ្យស្មគ្រចិត្ត សូមឱ្យបន្តចុះជួយពិនិត្យ ពិគ្រោះ និងព្យាបាលជំងឺជូនប្រជាពលរដ្ឋ នាពេលក្រោយៗទៀត សំដៅលើកកម្ពស់សុខុមាលភាព ប្រជាពលរដ្ឋ និងរួមគ្នាកាត់បន្ថយភាពក្រីក្រ ស្របពេលដែលប្រទេសជាតិយើងកំពុងមានសុខសន្តិភាព ក្រោមការដឹកនាំរបស់ សម្តេចតេជោ នាយករដ្ឋមន្ត្រី។ ឯកឧត្តម បានបន្ថែមថា បន្ទាប់ពីពិគ្រោះជំងឺរួចរួលជាមួយគ្រូពេទ្យ សូមធ្វើតាមការណែនាំរបស់ក្រុមគ្រូពេទ្យ ទាក់ទងពេលវេលាលេបថ្នាំ ការប្រើប្រាស់ថ្នាំ ការបរិភោគអាហារឲ្យបានត្រឹមត្រូវ និងត្រូវពិគ្រោះជំងឺជាបន្ត នៅពេលក្រោយៗ ទៀត។
បើតាមរបាយការណ៍របស់ លោកវេជ្ជបណ្ឌិត សៅ សំបូរ បានឲ្យដឹងថា ការពិគ្រោះជំងឺរួមមាន៖ជំងឺទូទៅ អប់រំសុខភាព ជំងឺផ្លូវចិត្ត ជំងឺទូទៅផ្នែកកុមារ ជំងឺរោគស្ត្រី ជំងឺឬដូងបាត ជំងឺសួត ក្រពះ ពោះវៀន ជំងឺផ្លូវដង្ហើម ជំងឺប្រដាប់រំលាយអាហារ ជំងឺសើស្បែក ជំងឺព្រូន ជំងឺស្លេកស្លាំង ជំងឺសន្លាក់ឆ្អឹង ជំងឺរលាកថ្លើម ជំងឺកាមរោគ ជំងឺគ្រុនចាញ់ ជំងឺគ្រុនឈាម ជំងឺភ្នែក សុខភាពមាត់ធ្មេញ ជំងឺទឹកនោមផ្អែម ជំងឺបេះដូង លើសឈាម ជំងឺត្រចៀក ច្រមុះ បំពង់ក ជំងឺកម្រងនោម អេកូសាស្ត្រ ម៉ាស៊ីនផ្លុំរកមេរោគក្រពះតាមរយះខ្យល់ដង្ហើម វាស់ចង្វាក់បេះដូង មន្ទីរពិសោធន៍(វិភាគឈាម) វះកាត់តូចនិងព្យាបាលរបួស …..។ល។
គួរជម្រាបថា ប្រជាពលរដ្ឋដែលបានមកពិនិត្យសុខភាពជាមួយនឹងក្រុមគ្រូពេទ្យស្ម័គ្រចិត្តរបស់ឯកឧត្តម ខៀវ កាញ្ញារីទ្ធ រដ្ឋមន្ត្រីក្រសួងព័ត៍មាន ពួកគាត់ថាមិនដឹងជារកពាក្យអ្វីយកមកប្រៀបផ្ទឹមទៅនិងទង្វើរបស់ក្រុមគ្រូពេទ្យស្ម័គ្រចិត្តបាននោះទេ មានតែលើកម្រាមដៃដប់ជូនពរ និងថ្លែងអំណរគុណដល់ក្រុមគ្រូពេទ្យស្ម័គ្រចិត្តរបស់ឯកឧត្តម រដ្ឋមន្ត្រី ដែលបានចុះមកពិនិត្យព្យាបាលដល់ប្រជាពលរដ្ឋក្នុងខេត្តកំពង់ចាម ដោយបានចែកជូនថ្នាំសម្រាប់ព្យាបាលរោគ ដល់ប្រជាពលរដ្ឋដែលមានជំងឺប្រចាំកាយ។ សម្រាប់ការយកចិត្តទុកដាក់ដល់ជីវិតរបស់ពួកគាត់ខាងលើនេះ ពួកគាត់ពិតជាមិនអាចបំភ្លេចបានឡើយ ជាកិច្ចតបស្នងនូវទង្វើដ៏ល្អខាងលើនេះ ពួកគាត់សន្យថា និងបោះឆ្នោតជូនគណបក្សប្រជាជន តកូន តចៅរបស់ពួកគាត់ គ្រប់ៗអាណត្តិ។
